Republika e Koresë ka zgjedhur për herë të parë përfaqësuesin e saj për Eurovision Song Contest Asia. JUNHEE do të përfaqësojë vendin në Bangkok me këngën “DEEP DIVE”, pasi fitoi “Korea’s Next Wave”, spektaklin e parë kombëtar të përzgjedhjes së vendit për këtë kompeticion.

Përzgjedhja u zhvillua më 4 shtator, me tetë këngë që konkurruan për votën e publikut. Votimi ishte i hapur për audiencën në mbarë botën, ndërsa rezultati përfundimtar u përcaktua nga tre burime të ndryshme. Juria profesionale përbënte 40% të rezultatit, vota e publikut në Republikën e Koresë përbënte 40%, ndërsa 20% e mbetur vinte nga votimi ndërkombëtar, i quajtur “Rest of the World”.

Pas JUNHEE dhe “DEEP DIVE”, në vendin e dytë u rendit “EHERADIYA”, interpretuar nga Sojeong Shim, ndërsa vendin e tretë e zuri dyshja Angel Noise me këngën “Nan Naya!”.

Edicioni i parë i “Korea’s Next Wave” u organizua nga transmetuesi ENA dhe u drejtua nga ylli i K-pop-it, Jo Kwon. Spektakli shënoi një moment të ri për skenën muzikore koreane, duke e lidhur për herë të parë përzgjedhjen kombëtare me rrugëtimin drejt Eurovision Song Contest Asia.

JUNHEE është një këngëtar dhe kantautor solo me bazë në Korenë e Jugut, i cili punon kryesisht në zhanret pop, R&B dhe dance. Muzika e tij anon nga tingujt e ndritshëm dhe të drejtpërdrejtë të muzikës mainstream, ndërsa një prej arsyeve që e shtyn të krijojë është dëshira për t’u përcjellë njerëzve energji pozitive.

Përveç muzikës, JUNHEE merret me aktivitet fizik, të cilin e ka si një prej hobive të tij. Së fundmi, pasi ka krijuar agjencinë e tij të pavarur, ai po përpiqet të ndërthurë rolin e drejtuesit të kompanisë me atë të këngëtarit, ndërsa vazhdon të ndërtojë karrierën e tij muzikore.

Me fitoren në “Korea’s Next Wave”, JUNHEE tashmë do të jetë emri që do të mbajë flamurin e Republikës së Koresë në edicionin e Eurovision Song Contest Asia në Bangkok, duke e bërë “DEEP DIVE” këngën e parë që do të përfaqësojë vendin në këtë garë./KultPlus.com