Peshëngritësi shkodran Erkand Qerimaj ka mbyllur pjesëmarrjen në Lojërat Mesdhetare “Taranto 2026” me një rezultat të rëndësishëm, duke vendosur pesë rekorde kombëtare në kategorinë 85 kg.
Qerimaj u rendit i katërti në dygarësh, duke luftuar deri në fund për zonën e medaljeve. Në garë, ai regjistroi rezultatet:
151 kg – rekord kombëtar
181 kg – rekord kombëtar
332 kg – rekord kombëtar
187 kg – rekord kombëtar në shtytje
338 kg – rekord kombëtar në dygarësh
Edhe pse këtë herë nuk arriti të sigurojë medalje, Qerimaj e ka konsideruar pjesëmarrjen në Taranto një tjetër kapitull të rëndësishëm të karrierës së tij sportive.
Në një postim pas garës, peshëngritësi shkodran thekson se sporti nuk matet vetëm me medalje, por edhe me përkushtimin, sakrificën dhe aftësinë për të luftuar deri në kilogramin e fundit.
Lojërat Mesdhetare kanë qenë prej vitesh një kompeticion i veçantë për Qerimajn. Në Pescara 2009, ai fitoi një medalje ari dhe një argjendi, ndërsa në Lojërat Mesdhetare në Algjeri siguroi një tjetër medalje argjendi.
Me rezultatet e arritura në Taranto, Qerimaj e çon bilancin e tij në këtë kompeticion në 1 medalje ari, 2 medalje argjendi, rekorde mesdhetare dhe tashmë 5 rekorde të reja kombëtare.
“Flamuri Kuqezi mbi supe, zemra në platformë dhe gjithmonë përpara”, shkruan Qerimaj në përfundim të mesazhit të tij, duke falënderuar familjen, miqtë dhe të gjithë mbështetësit që e kanë shoqëruar gjatë karrierës
