Presidenti amerikan Donald Trump ka pritur në Shtëpinë e Bardhë një delegacion rabinësh dhe liderësh të komunitetit hebre hasidik, mes të cilëve figura të njohura të lëvizjes Satmar, një prej grupimeve më të mëdha ultraortodokse hebraike që kundërshton për arsye fetare sionizmin dhe shtetin modern të Izraelit.
Takimi privat, i zhvilluar këtë javë, ka tërhequr vëmendjen për shkak të profilit të pjesëmarrësve dhe kontrastit të fortë me qëndrimet tradicionalisht pro-izraelite të Trump.
Sipas raportimit të Al Jazeera, rabinët besohet se kanë ngritur çështje që lidhen me luftërat e Izraelit dhe me rekrutimin e studentëve të shkollave fetare hebraike në ushtrinë izraelite.
Në delegacion bënin pjesë përfaqësues të rëndësishëm të komunitetit Satmar, një lëvizje hasidike ultraortodokse me qendra të mëdha në Shtetet e Bashkuara dhe komunitete në disa vende të tjera.
Satmarët nuk janë thjesht kritikë të Benjamin Netanyahut apo të politikave të qeverisë aktuale izraelite. Kundërshtimi i tyre është shumë më i thellë dhe lidhet me vetë ideologjinë e sionizmit.
Sipas interpretimit të tyre fetar, hebrenjtë nuk duhet të krijonin një shtet sovran përmes veprimit politik apo forcës ushtarake, por duhet të presin ardhjen e Mesisë për rikthimin e plotë në Tokën e Shenjtë.
Për këtë arsye, ata bëjnë dallim mes identitetit fetar hebraik dhe sionizmit si lëvizje politike. Lëvizja kundërshton legjitimitetin fetar të shtetit modern të Izraelit dhe ka qenë tradicionalisht kritike ndaj të gjitha qeverive izraelite, përfshirë edhe qeveritë e drejtuara nga Netanyahu.
Një nga përplasjet më të forta lidhet me çështjen e shërbimit ushtarak. Komunitetet ultraortodokse prej kohësh kanë kërkuar përjashtimin e studentëve të yeshivave, shkollave fetare hebraike, nga rekrutimi në ushtri.
Për Satmarët, kundërshtimi është edhe më i fortë, pasi ata nuk e njohin shtetin sionist si autoritet me legjitimitet fetar.
Takimi me Trump vjen në një moment të tensionuar për Izraelin, ku debati mbi rekrutimin e hebrenjve ultraortodoksë ka shkaktuar përçarje të thella politike dhe sociale, duke vënë shpesh në vështirësi edhe koalicionet qeverisëse të Netanyahut.
Ftesa e Trump për liderët antisionistë, ka shkaktuar debat pikërisht për shkak të marrëdhënies së tij të ngushtë me qeveritë izraelite dhe mbështetjes së fortë që ai i ka dhënë Izraelit gjatë karrierës së tij politike.
Prandaj takimi përbën një episod të rrallë në politikën amerikane. Një president që konsiderohet ndër aleatët më të fortë të Izraelit ka dëgjuar drejtpërdrejt pikëpamjet e një grupi hebre që refuzon të identifikojë judaizmin me sionizmin dhe kundërshton vetë bazën ideologjike mbi të cilën është ndërtuar shteti modern izraelit. \tesheshi.com\
