Presidenti i Libanit, Joseph Aoun i ka bërë thirrje Shteteve të Bashkuara dhe komunitetit ndërkombëtar që të ndërhyjnë menjëherë për të ndaluar sulmet izraelite mbi territorin libanez.

Kërkesa vjen pas një sërë goditjesh ajrore të sotme në jug të Libanit, të cilat sipas autoriteteve libaneze kanë shkaktuar vdekjen e të paktën katër personave, kanë dëmtuar objekte qeveritare dhe kanë shkatërruar një spital që ishte jashtë shërbimi.

Në një deklaratë zyrtare, Aoun i ka cilësuar sulmet si “një përshkallëzim të rrezikshëm” që “ka arritur deri në institucione të shtetit libanez” dhe në objekte shëndetësore.

Ai ka theksuar se këto veprime përbëjnë shkelje të rënda dhe ka kërkuar që Uashingtoni dhe vende të tjera “të veprojnë urgjentisht për të ndaluar këto shkelje”.

Sulmet ndodhën në një moment të ndjeshëm, ndërkohë që është në fuqi një armëpushim dhe janë duke u zhvilluar bisedime mes Izraelit dhe Libanit.

Sipas burimeve libaneze, goditjet kanë prekur edhe ndërtesa qeveritare, gjë që sipas presidentit Aoun shënon një hap të ri dhe shqetësues në përshkallëzimin e tensioneve.

Nga ana tjetër, Forcat e Mbrojtjes së Izraelit (IDF) kanë deklaruar se sulmet ajrore në jug të Libanit erdhën si përgjigje ndaj një sulmi me dron të kryer nga Hezbollah-u.

Sipas IDF-së, objektivat e goditura ishin anëtarë të grupit të quajtur terrorist dhe infrastruktura e tyre ushtarake. Izraeli pohon se veprimi ishte i synuar dhe i kufizuar, me qëllim neutralizimin e kërcënimeve të menjëhershme.

Incidenti i sotëm vjen në vazhdën e tensioneve të vazhdueshme përgjatë kufirit jugor të Libanit, ku shkëmbimet e zjarrit dhe sulmet e kufizuara kanë vazhduar edhe gjatë periudhave të armëpushimit.

Presidenti Aoun, i cili në muajin korrik 2026 u takua me presidentin amerikan Donald Trump në Shtëpinë e Bardhë, po përpiqet tani të mobilizojë mbështetjen ndërkombëtare për të mbrojtur sovranitetin libanez dhe për të parandaluar një përshkallëzim të mëtejshëm që mund të kërcënojë stabilitetin e brishtë të rajonit.

/rtsh.al/