Ministria e Mbrojtjes ka bërë të ditur situatën e zjarreve në vend gjatë 24 orëve të fundit, ku janë raportuar 32 vatra zjarri. Prej tyre, 11 vatra vijojnë të jenë aktive, 5 janë nën mbikëqyrje, ndërsa 16 janë shuar.

Për përballimin e situatës janë angazhuar në nivel kombëtar 735 forca vendore dhe 64 automjete zjarrfikëse. Në operacione kanë marrë pjesë edhe Forcat e Armatosura me 475 efektivë, 7 automjete zjarrfikëse, 4 helikopterë dhe një avion Air Tractor. Për ditën e sotme është parashikuar angazhimi i 160 forcave ushtarake në zonat ku ndërhyrjet vijojnë.

Vëmendja kryesore është përqendruar në vatrat më problematike.

Në Malin e Dajtit, përveç strukturave bashkiake, janë angazhuar 77 forca ushtarake dhe një helikopter.

Në Bardhaj të Shkodrës, operacioni vijon me 5 automjete zjarrfikëse, shërbimin pyjor dhe strukturat e emergjencave civile. Forcat e Armatosura kanë kontribuar me një automjet zjarrfikës dhe një helikopter, ndërsa sot në terren janë shtuar 33 forca dhe një ambulancë.

Në Fier, operacioni është mbështetur nga 13 automjete zjarrfikëse, 4 autobote, 55 efektivë dhe 90 forca të tjera, ndërsa nga Forcat e Armatosura janë angazhuar 90 ushtarakë, një helikopter dhe një avion Air Tractor. Për ditën e sotme vijon mbështetja me 33 forca.

Ndërkohë, operacioni në Himarë është përmbyllur, pas shuarjes së zjarrit. Në ndërhyrje u angazhuan 26 automjete zjarrfikëse, 120 efektivë, 40 vullnetarë, 67 forca bashkiake, 20 forca policore dhe 180 efektivë të Forcave të Armatosura, të mbështetur nga dy helikopterë.

Agjencia Kombëtare e Mbrojtjes Civile vijon monitorimin e pandërprerë të situatës në të gjithë territorin, në koordinim me prefekturat, bashkitë dhe strukturat e Mbrojtjes Civile.

Kapacitetet operacionale mbeten në terren dhe në gatishmëri për ndërhyrje, me prioritet mbrojtjen e jetës së qytetarëve, banesave, pasurisë dhe mjedisit.

/rtsh.al/