Sipas një raporti të OKB, ngrohja globale pritet që vitin e ardhshëm të kalojë pragun 1.5 gradë celsius, kufi i caktuar në Marrëveshjen e Parisit për klimën.
Raporti thotë se tejkalimi i këtij pragu tashmë konsiderohet gjerësisht i pashmangshëm, megjithatë theksohet se ende ekziston mundësia për ta kufizuar kohëzgjatjen dhe përmasën e këtij tejkalimi, duke e rikthyer temperaturën globale nën 1.5°C në një periudhë të mëvonshme.
Sipas Programit të Kombeve të Bashkuara për Mjedisin (UNEP) edhe skenari më optimist parashikon që temperatura globale të arrijë një pikë kulmore prej rreth 1.8°C mbi nivelet para-industriale, përpara se të nisë të ulet. Shumica e skenarëve të tjerë parashikojnë një rritje edhe më të madhe.
Raporti rekomandon një qasje të përshkruar si “tejkalim, kulm dhe rënie”, e cila synon të kufizojë sa më shumë rritjen e temperaturave dhe kohën gjatë së cilës ato qëndrojnë mbi 1.5°C.
