Ish-kryeministri i Kosovës, Ramush Haradinaj, ka kujtuar luftëtarin e lirisë, Hajdar Ahmeti, në 23-vjetorin e vdekjes së tij.

Përmes një postimi në Facebook, Haradinaj ka shkruar se Ahmeti ishte rritur në një familje atdhetare nga Reka e Keqe e Gjakovës dhe se së bashku me babain e tij, Hasanin, ishte bashkuar në radhët e Ushtrisë Çlirimtare të Kosovës.

Sipas Haradinajt, Hajdar Ahmeti e vazhdoi kontributin për vendin edhe pas përfundimit të luftës, duke shërbyer në uniformën e Policisë së Kosovës deri në momentin e vdekjes së tij.

Haradinaj ka treguar se bashkë me bashkëluftëtarë dhe banorë të zonës ka marrë pjesë edhe në zbulimin e pllakës përkujtimore të Shtabit Lokal të UÇK-së në fshatin Berjah.

“Me bashkëluftëtarë dhe banorë të kësaj ane, morëm pjesë në zbulimin e pllakës së Shtabit Lokal të UÇK-së në Berjah, në kujtim të kontributit të madh të bijve të kësaj ane për lirinë e Kosovës”, ka shkruar Haradinaj.

Ai ka përkujtuar me nderim Hajdar Ahmetin dhe të gjithë ata që sakrifikuan për lirinë e Kosovës.

“Lavdi e përjetshme veprës dhe kujtimit të Hajdar Ahmetit dhe të gjithë atyre që dhanë gjithçka për lirinë e Kosovës”, ka përfunduar Haradinaj./Arbresh.info