Një kallëzim i një qytetari mundësoi zbulimin dhe dokumentimin e një rasti penal, njoftoi sot Prokuroria Themelore Publike për Ndjekjen e Krimit të Organizuar dhe Korrupsionit, duke bërë të ditura detaje lidhur me ndalimin e një shoferi të Qeverisë, të dyshuar për marrje ryshfeti, përcjell Nistori.
Informacionet për rastin u bënë publike mëngjesin e sotëm përmes deklaratave të partive politike të pushtetit dhe opozitës, ndërsa më pas rasti u konfirmua edhe nga policia.
Prokuroria njoftoi se prokurori publik, duke vepruar mbi një kallëzim penal të paraqitur nga Njësia për Korrupsion pranë Byrosë së Sigurisë Publike, ka lëshuar urdhër për zhvillimin e procedurës hetimore kundër një personi të punësuar në Shërbimin për Punë të Përgjithshme dhe të Përbashkëta të Qeverisë.
Sipas Prokurorisë, ekziston dyshim i bazuar se i dyshuari ka kryer veprën penale „marrje e shpërblimit për ndikim të kundërligjshëm“.
„Procedura u iniciua pas kallëzimit të një qytetari, nga i cili i dyshuari, në periudhën nga 24 korriku deri më 4 shtator 2026, kishte kërkuar 1.500 euro për të shfrytëzuar ndikimin e tij të supozuar. I dyshuari, i cili punonte si shofer i një funksionari të lartë qeveritar, i kishte premtuar të dëmtuarit se do të ndërmjetësonte te zyrtarët e Qytetit të Shkupit lidhur me punësimin sipas një shpalljeje për pranimin e zjarrfikësve.
Pas kallëzimit, autoritetet kompetente, në koordinim me prokurorin publik, ndërmorën veprime për sigurimin e provave. Më 4 shtator 2026, i dyshuari u kap duke marrë 500 euro, si pjesë e shumës së kërkuar prej 1.500 eurosh. Paratë ishin shënuar paraprakisht“, thuhet në njoftimin e Prokurorisë.
Prokuroria vlerësoi se ekzistojnë rrethana që tregojnë rrezik arratisjeje, mundësi që i dyshuari të ndikojë te dëshmitarët gjatë procedurës, si dhe rrezik për përsëritjen e veprës penale. Për këtë arsye, prokurori publik propozoi caktimin e masës së paraburgimit, ndërsa gjyqtari i procedurës paraprake e pranoi propozimin.
Të dyshuarit iu caktua masa e paraburgimit në kohëzgjatje prej 30 ditësh.
„Raportimi në kohë i korrupsionit dhe gatishmëria e qytetarëve për të bashkëpunuar me institucionet kompetente janë jashtëzakonisht të rëndësishme. Raportimi i kërkesës ose ofertës për ryshfet dhe ndikim të kundërligjshëm mundëson reagimin në kohë, sigurimin e provave dhe veprimin efikas të autoriteteve kompetente.
Prokuroria Publike i inkurajon qytetarët që t’i raportojnë rastet e tilla dhe të bashkëpunojnë me institucionet kompetente, ndërsa mbetet e përkushtuar për të vepruar me vendosmëri ndaj të gjitha informacioneve për sjellje korruptive, për të cilat ekzistojnë baza për ndërmarrjen e veprimeve prokuroriale“, shtohet në njoftim. /Nistori/**
