Sezoni i festave të fundvitit 2026 mund të duket krejt ndryshe, pasi Grand Theft Auto VI pritet të shndërrohet në një nga prezantimet më të mëdha të historisë së industrisë së argëtimit.
Pas më shumë se një dekade pritjeje, fansat tashmë kanë shënuar në kalendar datën 19 nëntor, kur Rockstar planifikon të publikojë lojën për PlayStation 5 dhe Xbox Series X|S. Entuziazmi është aq i madh sa disa lojtarë po planifikojnë pushimet e tyre vetëm për t’iu përkushtuar lojës.
Bud Burruss, një inxhinier softueri 36-vjeçar, tregoi për The Wall Street Journal se do të marrë pesë ditë pushim gjatë javës para Ditës së Falënderimeve. Ai planifikon të flejë herët të mërkurën dhe të zgjohet rreth orës 1 ose 2 të mëngjesit të së enjtes për të nisur menjëherë aventurën në GTA VI. Madje ka përgatitur edhe kamerën për të regjistruar material për kanalin e tij në YouTube.
Edhe Anna Ray, 30 vjeçe, përfaqësuese e shitjeve mjekësore dhe mundëse profesioniste, do të marrë pushime për një javë të plotë. Ajo ka planifikuar madje edhe gatimin paraprak të vakteve, për të fituar sa më shumë kohë për lojën.
Në Brazil, nëpunësi civil Guilherme Stephano do të përdorë 10 ditë pushime, edhe pse më pak se 20 ditët që mori për Red Dead Redemption 2 në 2018.
Pas pamjeve të zgjeruara të publikuara së fundmi nga Rockstar, fansat po analizojnë çdo detaj. Me botën e saj masive dhe aktivitetet nga misionet intensive te përditshmëria virtuale, GTA VI mund të vendosë rekorde të reja jo vetëm në gaming, por në të gjithë industrinë e argëtimit.
