Activision ka kaluar në një nivel tjetër luftën kundër mashtruesve në Call of Duty, duke publikuar pamjet e një përfaqësuesi ligjor që shkon në shtëpinë e një shitësi të njohur të cheat-eve në Ohio për t’i dorëzuar një urdhër ligjor.
Videoja rreth një minutëshe u publikua në llogarinë zyrtare të Call of Duty, ndërsa dokumenti ishte dorëzuar më 22 gusht, gjatë beta-s së mbyllur të Modern Warfare 4. Në pamje, përfaqësuesi mbërrin në banesë, takon shitësin dhe i dorëzon dokumentet. Pa debate apo përplasje, vetëm me një paralajmërim ligjor dhe më pas largohet.
Personi në fjalë është Elocarry, i cili shiste cheats për Call of Duty, por edhe për lojëra të tjera multiplayer si Rust dhe Apex Legends. Para ndërhyrjes, ai reklamonte paketa për Black Ops 7 dhe Warzone, duke pretenduar se ishin të mbrojtura ndaj sistemit anti-cheat RICOCHET. Abonimet tre mujore arrinin deri në 79.99 paund.
Pas vizitës, Elocarry njoftoi në Discord se shitjet e produkteve Call of Duty ishin “pezulluar përkohësisht” ndërsa çështja po shqyrtohej.
Activision thotë se ky është vetëm një nga veprimet e një fushate më të gjerë. Kompania pretendon se ka dërguar mbi 80 urdhra të tillë, ka goditur më shumë se 375 operacione rishitjeje dhe ka ndaluar mbi 30 shitës.
Ndërkohë, Activision raporton përmirësime në RICOCHET gjatë beta-s së Modern Warfare 4, me më pak lojtarë të infektuar, bllokime hardware më të vështira për t’u anashkaluar dhe reagim më të shpejtë ndaj mashtruesve.
Modern Warfare 4 do të publikohet më 23 tetor për PC, PS5, Xbox Series X/S dhe Switch 2.
