Valët ekstreme të të nxehtit që goditën Evropën gjatë kësaj vere mund të kenë shkaktuar më shumë se 33 mijë vdekje, sipas një analize të re të bazuar në të dhënat e EuroMOMO. Shifrat përfshijnë vetëm tetë vende: Gjermaninë, Francën, Spanjën, Anglinë, Belgjikën, Holandën, Austrinë dhe Portugalinë.
Periudha më vdekjeprurëse ishte java e fundit e qershorit, kur u regjistruan rreth 16 mijë vdekje të tepërta. Në javën e parë të korrikut u regjistruan edhe rreth 8 mijë të tjera.
Gjermania kryeson listën me rreth 14 mijë vdekje të lidhura me temperaturat e larta deri më 9 gusht, niveli më i lartë që prej fillimit të regjistrimeve në vitin 2016. Në Francë u vlerësuan rreth 7,300 viktima deri më 22 korrik, ndërsa në Spanjë afro 4,500 persona humbën jetën nga i nxehti.
Belgjika regjistroi rreth 2,570 vdekje të tepërta, ndërsa Holanda 968. Austria raportoi 396 dhe Portugalia më shumë se 600.
Në Mbretërinë e Bashkuar, dy valë të të nxehtit në maj dhe qershor mund të kenë shkaktuar rreth 2,700 vdekje, me studime që sugjerojnë se ndryshimet klimatike kontribuuan ndjeshëm në një pjesë të tyre.
Ekspertët paralajmërojnë se shifrat evropiane pritet të rriten, pasi vala e gjatë e të nxehtit që nisi në fund të korrikut sapo ka përfunduar.
Sipas studiuesve, ndryshimet klimatike po i bëjnë valët e të nxehtit më të shpeshta dhe intensive, duke e kthyer temperaturën ekstreme në një rrezik gjithnjë e më të madh për shëndetin publik, veçanërisht për të moshuarit dhe fëmijët.
