Në një IFA 2026 të mbushur me robotë, inteligjencë artificiale dhe pajisje smart për çdo cep të shtëpisë, Geek Room dhe Neptun panë se stenda e Birdfy ofronte diçka pak më ndryshe: teknologji që të bën të ndalosh dhe të shikosh çfarë po ndodh në natyrën përreth teje.
Birdfy debuton për herë të parë në panairin më të madh evropian të teknologjisë, pas një viti të rëndësishëm për kompaninë, e cila ka kaluar shifrën e 1 milion njësive të shitura globalisht. Në Berlin, kompania ka sjellë disa prej produkteve të saj më interesante për të treguar se vëzhgimi i zogjve mund të jetë po aq “inteligjent” sa edhe vetë shtëpia jonë.
Në qendër të stendës ishte Birdfy Feeder Metal 2 4K, një ushqyes inteligjent për zogjtë i pajisur me kamerë 4K, që lejon përdoruesit të shohin nga afër vizitorët me pendë që ndalojnë në oborr apo ballkon. Produkti ka marrë edhe vlerësimin “Best in Shoë” nga Trusted Reviews gjatë IFA 2026.
Por Birdfy nuk ndalet vetëm tek ushqyesit. Birdfy Bath Pro përdor një sistem me dy kamera për të ndjekur zogjtë ndërsa pijnë ujë apo lahen, ndërsa Birdfy Nest Duo ofron pamje si nga brenda, ashtu edhe nga jashtë folesë, falë dy kamerave të integruara.
Pas vetëm 6 vitesh aktivitet, kompania ka zgjeruar ndjeshëm portofolin e saj dhe mesazhi në IFA është i qartë se teknologjia nuk duhet gjithmonë të na largojë nga bota reale.
Në rastin e Birdfy, ajo përdoret si një urë mes njeriut dhe natyrës. Dhe në një panair ku pothuajse çdo produkt premton të bëjë jetën “më inteligjente”, ndoshta një kamerë që të ndihmon të zbulosh zogjtë që vizitojnë oborrin tuaj është një nga mënyrat më interesante për ta bërë teknologjinë pak më njerëzore.
