Jemi në Berlin së bashku me Neptun në IFA 2026 dhe një nga produktet që na tërhoqi menjëherë vëmendjen në stendën e Dreame është X60 Pro Ultra Complete. Ky është roboti më i avancuar i kompanisë për pastrimin e shtëpisë dhe, pasi e pamë nga afër në veprim, bëhet e qartë se Dreame po synon ta çojë automatizimin e pastrimit në një tjetër nivel.
X60 Pro Ultra Complete kombinon një fuqi thithëse prej 42,000 Pa me sistemin HyperStream DuoBrush, të krijuar për të kapur flokët dhe qimet e kafshëve pa krijuar ngatërrime. Por ajo që bie më shumë në sy është aftësia për të pastruar edhe aty ku robotët tradicionalisht kanë probleme. Dy krahët UltraExtend mund të zgjaten deri në 12–16 cm, duke arritur në qoshe, përgjatë mureve dhe në hapësirat poshtë mobilieve.
Roboti përdor gjithashtu sistemin AI OmniSight për identifikimin e objekteve dhe navigimin inteligjent, ndërsa mund të kalojë pengesa deri në 10 cm. Stacioni kujdeset për pjesën tjetër: nga zbrazja automatike deri te larja e leckave me ujë të nxehtë deri në 100°C.
Dreame nuk u ndal vetëm te X60. Në IFA 2026 kompania prezantoi edhe Aqua20 Pro Ultra Roller X Complete, aspiratorë të rinj wet & dry, robotin për kositjen A4 AWD Pro Series, robotin për pastrimin e xhamave Pano 10 dhe kamerën e parë të aksionit të kompanisë, Leaptic Cube.
Nga ajo që pamë në Berlin, X60 Pro Ultra Complete është padyshim një nga produktet që meriton më shumë vëmendje në këtë edicion të IFA.
