Një grua 64-vjeçare ka humbur jetën të shtunën, më 5 shtator, pasi u sulmua dhe u godit nga një dem gjatë një gare me dema në qytetin Aýna, në provincën Albacete të Spanjës.
Ngjarja tragjike ndodhi gjatë festimeve lokale, ndërsa gruaja po ndiqte garën. Sipas autoriteteve, ajo ndodhej jashtë barrierave mbrojtëse të vendosura përgjatë itinerarit, kur njëri prej demave u shkëput nga grupi dhe e sulmoi.
Kryebashkiaku i Aýnës, Juan Ángel Martínez, tha se 64-vjeçarja qëndronte e palëvizshme pranë një barriere në lagjen Las Cuevas, në momentin kur nisën të vraponin demat. Njëri prej tyre iu drejtua dhe e goditi rëndë.
Shërbimet e urgjencës së Castilla-La Mancha morën njoftimin rreth orës 10:55 dhe në vendngjarje u dërgua edhe një helikopter mjekësor. Pavarësisht ndërhyrjes së menjëhershme të ekipeve mjekësore, gruaja ndërroi jetë nga plagët e marra gjatë transportimit drejt pistës së helikopterit.
🇪🇸🐂 Una mujer de 64 años murió tras ser corneada por un toro durante los encierros de las fiestas patronales de Aýna, Albacete, España. pic.twitter.com/aOdiz4wZoO
— Alerta Mundial (@AlertaMundoNews) September 5, 2026
Sipas kryebashkiakut, viktima ishte me origjinë nga Katalonja dhe jetonte me familjen e saj në zonën e Sierra del Segura.
Gjatë së njëjtës garë u plagos edhe një burrë rreth të 60-ave, i cili pësoi dëmtime në dorë pasi u sulmua nga një tjetër dem.
Pas tragjedisë, kryebashkiaku njoftoi pezullimin e të gjitha aktiviteteve të planifikuara për të shtunën. Festimet lokale, të zhvilluara në nder të Zonjës së Santa María de los Altos, ishin parashikuar të vijonin deri më 8 shtator.