Kryeministri Edi Rama përballet me 300 pyetje të gazetares Rudina Xhunga në një intervistë maratonë që zgjat më shumë se katër orë dhe i paraprin sezonit të ri të podkastit “Flasim”.
Ndryshe nga formati i zakonshëm, këtë herë është Xhunga ajo që drejton bisedën, ndërsa Rama u përgjigjet pyetjeve të saj.
Në videon e publikuar nga kryeministri shfaqen disa shkëputje nga intervista, ku Rama flet për investimin në Sazan-Zvërnec, SPAK-un, situatën në Bashkinë e Tiranës, marrëdhëniet mes pushteteve dhe pasardhësin e tij politik.
Për Sazanin, Rama shprehet se ishulli nuk po shitet dhe se do të mbetet pronë e Republikës së Shqipërisë. Ndërsa për SPAK-un deklaron se përdorimi i mediave për të “baltosur” persona që do të merreshin nën akuzë është një nga gjërat më të këqija që ka bërë institucioni.
Për Bashkinë e Tiranës, Rama thotë: “Bashkia nuk ka kokë”, ndërsa për pushtetin dhe pasardhësin e tij politik shprehet: “Pushteti është një kafshë e përbindshme” dhe “Unë personalisht nuk kam ndërmend të zgjedh pasardhës”.
Intervista mbyllet me një batutë mes Ramës dhe Xhungës.
“Në momentin që unë e kapërcej pragun e asaj dere, ju do të shpëtoni nga unë”, thotë Rama.
“Mos më shko në fund se do të të pyes, kemi akoma pyetje”, i përgjigjet Xhunga.
Intervista e plotë pritet të publikohet së shpejti në rrjetet sociale.