Të dërguarit e presidentit amerikan Donald Trump, Steve Witkoff dhe Jared Kushner, pritet të takohen të dielën me zyrtarë ukrainas në Kiev, pas bisedimeve të zhvilluara me presidentin rus Vladimir Putin në Moskë.
Witkoff dhe Kushner u takuan me liderin rus të shtunën, në kuadër të përpjekjeve për të avancuar një plan që synon t’i japë fund luftës në Ukrainë, e cila nisi pas pushtimit të plotë rus në shkurt të vitit 2022.
Një zyrtar i Shtëpisë së Bardhë tha se dy të dërguarit u takuan me Putinin për të çuar përpara nismën e Trump për paqe në luftën mes Rusisë dhe Ukrainës. Sipas tij, palët diskutuan plane konkrete për hapat e ardhshëm, të cilat pritet të bëhen publike në javët në vijim.
Këshilltari i Kremlinit, Yuri Ushakov, e përshkroi takimin si të hapur dhe të drejtpërdrejtë, duke thënë se pala amerikane kishte paraqitur disa ide për rrugët e mundshme drejt një marrëveshjeje.
Ushakov tha gjithashtu se pala ruse u kishte bërë të qartë amerikanëve se Moska beson se mund të marrë nën kontroll edhe pjesën e mbetur të Ukrainës lindore.
Ndërkohë, presidenti ukrainas Volodymyr Zelenskyy tha se kishte zhvilluar një bisedë me Witkoff dhe Kushner dhe se Kievi është gati për bisedime konkrete.
Zelenskyy konfirmoi gjithashtu se Ukraina është e gatshme të ndalojë sulmet ajrore gjatë periudhës së negociatave. Ai tha se pret që Rusia të ndërmarrë të njëjtin hap dhe të ndalojë sulmet ndaj Kievit.
Në të njëjtën kohë, presidenti Putin ka urdhëruar ndalimin e sulmeve ndaj Kievit për tre ditë, gjatë kohës që të dërguarit amerikanë do të zhvillojnë takimet e tyre në Ukrainë.
Presidenti Trump deklaroi të premten se Witkoff dhe Kushner po udhëtonin me një propozim për t’i dhënë fund luftës, duke shprehur optimizëm për mundësinë e arritjes së një marrëveshjeje.
“Ka një shans të mirë që ta bëjmë”, tha Trump.