Policia e Sarandës ka goditur një grup të dyshuar për shpërndarje të lëndëve narkotike dhe armëmbajtje pa leje, në kuadër të operacionit të koduar “Vjeshta”, i finalizuar pas një hetimi dy-mujor në bashkëpunim me Prokurorinë.
Në kuadër të operacionit janë kapur dhe ndaluar 20 persona, ndaj të cilëve Gjykata e Sarandës kishte caktuar masën e sigurisë “arrest në burg”.
Mes të arrestuarve është edhe Altin Arapi, i dyshuar si “koka” e grupit që merrej me shpërndarjen e lëndëve narkotike.
Të arrestuarit janë Altin Arapi, Arlind Kostaq Osmani, Feliks Faik Filija, Medi Enver Myftaraj, Nikolin Martin Rakipi, Altin Halit Arapi (Demiri), Klerjan Milsim Popshimi, Redian Astrit Arizi, Erjon Ruhan Dido, Dhimitër Astrit Terolli, Xhuliano Emin Mejdi, Vasil Armandi Kaçi, Flatun Orhan Lalaj, Bledar Adi Kovaci, Shefqet Ronald Bezhani, Andrea Vlash Babi, Nazif Edmond Refitaj, Elvis Edmond Demçaj, Devis Stavro Saliaj dhe Korado Edmondi Omeri.
Ndërkohë, u procedua në gjendje të lirë shtetasi E. N., 36 vjeç, banues në Lushnjë, pasi kundërshtoi shërbimet e Policisë gjatë kontrollit në një dhomë hoteli.
Gjatë operacionit dhe kontrolleve të ushtruara, Policia sekuestroi sasi kokaine dhe kanabisi, dy pistoleta, katër automjete, 19 aparate celulare, si dhe një shumë parash në lekë dhe euro.
Hetimet
Operacioni është rezultat i një hetimi të nisur dy muaj më parë nga Komisariati i Policisë Sarandë, në bashkëpunim me Prokurorinë.
Më 31 korrik 2026, në kuadër të të njëjtit procedim, u arrestuan në flagrancë tre shtetas, A. N., A. C. dhe K. J. Gjatë këtij aksioni u sekuestruan 5 kilogramë lëndë narkotike e dyshuar kanabis, e cila, sipas hetimeve, dyshohej se do të shpërndahej në Sarandë dhe Ksamil.
Nga hetimet e deritanishme dyshohet se grupi ushtronte aktivitetin e shitjes së lëndëve narkotike në zonën e Sarandës, përfshirë plazhet, lokalet e natës dhe zonat pranë shkollave.