Mijëra qytetarë marshuan të shtunën në kryeqytetin e Kroacisë, Zagreb, duke kërkuar nga qeveria ndërhyrje urgjente për pastrimin e një landfilli të paligjshëm ku janë depozituar mbetje të rrezikshme.
Protesta ishte një nga më të mëdhatë që Kroacia ka parë vitet e fundit dhe u zhvillua në një klimë të rritjes së pakënaqësisë ndaj autoriteteve.
Shkak për protestën është bërë vonesa prej muajsh në largimin e më shumë se 30 mijë tonëve mbetje, mes tyre materiale mjekësore dhe industriale, të groposura pranë qytetit të Gospićit, në rajonin malor të Likës.
Protestuesit akuzojnë qeverinë konservatore të kryeministrit Andrej Plenković për neglizhencë, ndërsa opozita e ka shndërruar çështjen edhe në një akuzë më të gjerë për korrupsion dhe përpjekje për të fshehur përmasat reale të ndotjes.
Në shkurt, policia kroate, në bashkëpunim me Europol-in, arrestoi 13 persona të dyshuar për importimin dhe depozitimin e paligjshëm të mbetjeve.
Sipas hetuesve, mbetjet ishin sjellë nga vende të tjera të Bashkimit Evropian që prej vitit 2023, ndërsa skema dyshohet se kishte gjeneruar më shumë se 4 milionë dollarë për personat e përfshirë.
Kryeministri Plenković vizitoi zonën javën e kaluar dhe deklaroi se qeveria kishte përzgjedhur një kompani që do të nisë largimin e mbetjeve. Ai e cilësoi këtë si fazën e parë të procesit të pastrimit.