Situata në Frakull të Fierit është qetësuar pas zjarrit masiv që përfshiu kodrat e zonës dhe shkaktoi dëme në gjashtë fshatra.
Aktualisht, në zonë është vetëm një pikë zjarri, ku po ndërhyjnë 30 trupa të Forcave të Armatosura për neutralizimin e flakëve.
Pavarësisht se situata paraqitet e qetë deri më tani, masivi me pisha në zonë mbetet një faktor rreziku për riaktivizimin e zjarrit.
Zjarri nisi pasditen e së premtes dhe vijoi deri të shtunën. Për shuarjen e flakëve u angazhuan edhe mjete ajrore, me avionët “Air Tractor” që ndërhynë nga ajri për të neutralizuar vatrat e zjarrit.
Për shkak të përhapjes së flakëve, u kryen edhe evakuime në zonat e prekura. Megjithatë, pasi situata u vu nën kontroll, banorët u rikthyen në shtëpitë e tyre.
Ndërkohë, policia ka arrestuar një 50-vjeçar në Daullas, i cili kishte ndezur zjarr për të djegur barishte, por flakët i dolën jashtë kontrollit. Megjithatë, personi përgjegjës për zjarrin masiv që përfshiu Frakullën dhe zonat përreth ende nuk është identifikuar.