Mbi 24 orë përballje me zjarrin në Shkodër, flakët afrohen pranë banesave

Zjarri që ka përfshirë disa zona të Shkodrës vijon të jetë aktiv edhe pas më shumë se një dite, duke shtrirë vatrat në territorin e Myselimit dhe kodrat përreth Bardhajve, transmeton Gazeta Metro.

Flakët kanë përfshirë kryesisht zona me bimësi dhe pyje me pisha. Kushtet e pafavorshme atmosferike, veçanërisht erërat e forta, së bashku me terrenin e vështirë, po e bëjnë më të komplikuar operacionin për vënien nën kontroll të zjarrit.

Situata paraqitet më shqetësuese në Bardhaj, ku vatra e zjarrit është afruar pranë zonave të banuara. Një prej banorëve ka bërë të ditur se nga flakët i janë shkaktuar dëme në ullishte, si dhe në disa prej makinerive që përdor për punë, raporton Abcnews.al.

Ekipet e emergjencës vazhdojnë përpjekjet për izolimin e vatrave. Në operacion janë angazhuar zjarrfikës nga Shkodra, ndërsa në ndihmë të tyre kanë dalë edhe forcat nga Vau-Dejësi. Për shuarjen e flakëve po përdoret gjithashtu një helikopter.

Deri tani nuk ka të dhëna për persona të lënduar, ndërsa autoritetet vijojnë monitorimin e situatës dhe ndërhyrjen në zonat ku zjarri paraqet rrezik më të madh.