Një parfum i mirë nuk ka pse të riaplikohet disa herë gjatë ditës për të lënë pas një aromë të këndshme. Mënyra si përgatitet lëkura, ku vendoset parfumi dhe si kombinohen produktet e kujdesit personal mund të ndikojnë në kohëzgjatjen e aromës.
Nga hidratimi pas dushit deri te përdorimi i duhur në flokë dhe rroba, disa hapa të thjeshtë mund ta bëjnë parfumin të qëndrojë më gjatë.
Hapi i parë për një ndjesi freskie është kujdesi për higjienën e trupit. Një dush i mirë largon djersën dhe papastërtitë, veçanërisht në zonat ku ato grumbullohen më shumë, si sqetullat dhe këmbët.
Lëkura e hidratuar është një bazë më e mirë për aplikimin e aromës. Pas dushit, përdorni krem ose locion trupi ndërkohë që lëkura është ende pak e lagësht.
Një rutinë e tillë ndihmon edhe në parandalimin e tharjes së lëkurës dhe mund ta bëjë aromën të zgjasë më shumë.
Nëse xheli i dushit, locioni dhe parfumi kanë nota të ngjashme, aroma mund të krijojë një efekt më të plotë.
Kjo teknikë, e njohur si vendosja e aromës në shtresa, mund të ndihmojë që parfumi të perceptohet më gjatë pa pasur nevojë për spërkatje të shpeshta.
Qafa, pas veshëve, kyçet e duarve dhe pjesa e brendshme e bërrylave janë ndër zonat ku zakonisht aplikohet parfumi.
Nxehtësia natyrale e trupit ndihmon në përhapjen e aromës, ndaj këto pika mund të jenë më efektive sesa aplikimi i rastësishëm.
Një gabim i zakonshëm është fërkimi i kyçeve pasi është vendosur parfumi. Në vend që ta bëni këtë, lëreni aromën të thahet natyrshëm në lëkurë.
Kështu shmangni përhapjen e panevojshme të parfumit dhe lejoni që notat aromatike të zhvillohen gradualisht.
Flokët kanë aftësi ta ruajnë aromën, por përdorimi i parfumit të zakonshëm direkt mbi to nuk është gjithmonë zgjedhja më e mirë.
Një alternativë është përdorimi i produkteve të krijuara posaçërisht për flokët. Mjafton një sasi e vogël për të krijuar një aromë delikate.
Pëlhurat mund ta mbajnë aromën për një kohë më të gjatë sesa lëkura. Nëse dëshironi ta aplikoni parfumin edhe në veshje, bëjeni nga një distancë e caktuar dhe me një sasi të moderuar.
Kujdes duhet treguar me materialet delikate dhe veshjet me ngjyra të çelëta, pasi disa parfume mund të lënë shenja.
Nëse pas disa orësh nuk e ndieni më parfumin, kjo nuk do të thotë patjetër se aroma është zhdukur. Shpesh, shqisa e nuhatjes mësohet me një aromë pas ekspozimit të vazhdueshëm dhe nuk e percepton më me të njëjtin intensitet.
Për këtë arsye, para se të hidhni sërish parfum, mund të jetë mirë të kontrolloni nëse aroma është ende e pranishme.
Parfumi është vetëm pjesa përfundimtare e rutinës. Rrobat e pastra, deodoranti, higjiena e përditshme dhe kujdesi për lëkurën janë baza për të ruajtur një ndjesi freskie gjatë gjithë ditës.
Nëse këto hapa kombinohen me një aplikim të moderuar të parfumit, nuk ka nevojë ta mbani shishen me vete për ta përdorur vazhdimisht./ Zoom.al
