Aktori i njohur i skenës dhe ekranit, Reshat Arbana, në kuadër të 86-vjetorit të lindjes është nderuar me një çmim të veçantë gjatë Festivalit Kombëtar të Filmit Shqiptar.
I emocionuar përpara publikut, Arbana tha se, pavarësisht mijëra daljeve në skenë gjatë karrierës së tij, emocionet e kësaj mbrëmjeje ishin të papërjetuara më parë.
“Jam tepër i emocionuar. Kam dalë mijëra herë në skenë, por emocionet që kam ndjerë sonte, nuk i kam ndjerë ndonjëherë. Në këto kohë të çmendura që po jetojmë, ngjarje si kjo e sotmja janë me rëndësi të madhe”, u shpreh ai.
Arbana rrëfeu se kishte menduar se kapitulli i çmimeve dhe dekoratave për të ishte mbyllur, por vlerësimi i marrë në këtë moment të veçantë të jetës së tij e preku thellë.
“S'dal dot në pazar se të gjithë duan të rrinë me mua! Çfarë bëra unë për këto çmime e medalje? Punova shumë. Më është dashur diçka e vogël, siç thoshte Kadri Roshi, që ai e quante dhunti, por unë e quaj talent. Të tjerat ishin punë”, deklaroi aktori.
Ai ia dedikoi çmimin edhe kolegëve që e mbështetën në fillimet e karrierës.
“Me ndihmën e këtyre njerëzve të mrekullueshëm, të këtyre aktorëve të mëdhenj, të vërejtjeve, sugjerimeve, përkrahjes, arrita të bëhesha një aktor që gëzoj respektin e popullit”, tha Arbana.
Në mbrëmjen hapëse u nderuan gjithashtu emra të rëndësishëm të kinematografisë shqiptare, mes tyre Pirro Milkani dhe Xhevdet Ferri, për kontributin e tyre në artin shqiptar. Çmimet për ta u morën nga familjarët, të cilët kujtuan veprën dhe trashëgiminë e tyre.
Në skenë u ngjit edhe aktorja Roza Anagnosti, e cila u vlerësua për kontributin e saj të gjatë artistik. Një pjesë të këtij vlerësimi ajo ia kushtoi bashkëshortit të ndjerë, regjisorit të njohur Dhimitër Anagnosti.
Mbrëmja e parë e festivalit u kthye kështu në një homazh për brezat e artistëve që kanë ndërtuar historinë e kinemasë dhe teatrit shqiptar.
