Trajtimi i kancerit në mëngjes mund të dyfishojë kohën e mbijetesës, sugjeron studimi

Studiuesit analizuan 2 mijë e 631 pacientë me kancer të avancuar, të cilët morën trajtim mes viteve 2018 dhe 2023.

Sipas rezultateve, pacientët me kancer të lëkurës ose mushkërive, si dhe disa persona me kancer të veshkave, ishin ndër ata që duket se përfitonin më shumë kur imunoterapia jepej në fillim të ditës dhe jo pas drekës.

Imunoterapia funksionon duke ndihmuar sistemin imunitar që t’i njohë dhe t’i sulmojë qelizat kancerogjene.

Studimi zbuloi se pacientët që shumicën e trajtimeve i merrnin në mëngjes jetonin më shumë se dy herë më gjatë se ata që trajtoheshin kryesisht pasdite.

Rezultatet u publikuan nga studiues të “The Christie”, një spital i specializuar për kancer në Manchester, dhe u bazuan në analizimin e të dhënave të 2 mijë e 631 pacientëve me kancer të avancuar.

Autori i lartë i studimit tha se rezultatet tregojnë se “duket se ekziston një sinjal që ia vlen të hetohet më tej”, megjithëse studimi nuk mund të provojë se përmirësimi i mbijetesës ishte shkaktuar drejtpërdrejt nga marrja e trajtimit në mëngjes.

Profesori Paul Lorigan, i cili është gjithashtu onkolog konsulent në “The Christie”, tha për “The Telegraph”: “Gjetjet tona sugjerojnë se pacientët që marrin imunoterapi më herët gjatë ditës mund të kenë rezultate më të mira se ata që trajtohen më vonë.”

“Megjithatë, ky ishte një studim retrospektiv, prandaj nuk mund të konkludojmë se vetëm koha e trajtimit është përgjegjëse për këtë dallim”, shtoi ai.

Shkencëtarët po hetonin nëse ritmi cirkadian, ose ora biologjike e trupit, mund të ndikojë në mënyrën se si funksionon sistemi imunitar dhe si i përgjigjet ai trajtimit.

NHS e përshkruan ritmin cirkadian si orën e brendshme biologjike të trupit.

Sipas studimit, pacientët me melanomë, forma më vdekjeprurëse e kancerit të lëkurës, reaguan veçanërisht mirë ndaj trajtimit të dhënë në mëngjes.

Pacientët që i merrnin infuzionet në pjesën e hershme të ditës kishin një mbijetesë mesatare prej 43.1 muajsh, krahasuar me 21.1 muaj te pacientët që trajtoheshin kryesisht pasdite.

Ndërkohë, te pacientët me kancer të mushkërive që merrnin atezolizumab ose pembrolizumab, mbijetesa mesatare për ata që trajtoheshin në mëngjes ishte 24.2 muaj.

Te grupi që merrte trajtimin pasdite, mbijetesa mesatare ishte 11.8 muaj.

Studimi përfshiu pacientë që po trajtoheshin për lloje të ndryshme të kancerit gjatë periudhës 2018–2023.

Megjithatë, shkencëtarët paralajmëruan se mund të ketë edhe shpjegime të tjera për rezultatet e studimit.

Për shembull, pacientët në gjendje më të rëndë mund të kenë nevojë për kontrolle shtesë klinike përpara trajtimit, gjë që mund të bëjë që takimet e tyre të shtyhen për në orët e pasdites.

Studiuesit e “The Christie” tani po kërkojnë financim për një studim të ri, të planifikuar dhe të randomizuar, në bashkëpunim me shkencëtarë nga Universiteti i Southamptonit dhe Universiteti i Cardiffit.

Qëllimi është të përcaktohet më qartë nëse koha e ditës kur jepet imunoterapia ndikon realisht në efektivitetin e saj dhe në mbijetesën e pacientëve me kancer.