Momente paniku janë regjistruar në sfidën mes Juve Stabia dhe Pisa-s, në Itali, pasi mbrojtësi bullgar i skuadrës mike, Rosen Bozhinov, u rrëzua papritur në fushë dhe mbeti i palëvizur.
Ngjarja ndodhi pak pas minutës së 40-të, duke shkaktuar shqetësim të madh te shokët e skuadrës dhe lojtarët kundërshtarë.
Ndeshja u ndërpre menjëherë, ndërsa stafi mjekësor hyri në fushë për t’i dhënë ndihmën e parë futbollistit. Pamjet televizive treguan momentet e ankthit të lojtarëve të të dyja skuadrave.
Arbitri thirri kapitenët dhe pjesëtarët e dy pankinave dhe, pas konsultimit, u vendos që ndeshja të ndërpritej përkohësisht.
Bozhinov u nxor nga fusha me barelë dhe u transportua me ambulancë drejt spitalit San Leonardo në Castellammare di Stabia.
Fillimisht pati frikë për një problem serioz shëndetësor, por më pas u bë e ditur se mbrojtësi kishte pësuar një gjendje të rënduar dehidratimi, e shoqëruar me konvulsione. Sipas burimeve të Lega B, futbollisti ka qenë i vetëdijshëm gjatë gjithë kohës.
Gjendja e Bozhinov
Bozhinov ndodhet nën vëzhgim në spital, ndërsa gjendja e tij raportohet e qëndrueshme.
Sipas buletinit mjekësor, futbollisti është zgjuar, i vetëdijshëm dhe me parametra jetësorë të qëndrueshëm.
“Bozhinov aktualisht është vigjilent, i vetëdijshëm dhe me parametra jetësorë të qëndrueshëm. Do të qëndrojë i shtruar për vëzhgim, në mënyrë që të përfundojnë ekzaminimet diagnostikuese”, thuhet në njoftimin mjekësor.