Aksion i madh antidrogë në Sarandë, arrestohen 20 persona

Operacioni, i koduar “Vjeshta”, u zhvillua nga Policia në bashkëpunim me Prokurorinë e Sarandës, ndërsa ndaj 20 të dyshuarve Gjykata kishte caktuar masën e sigurisë “arrest në burg”.

Gjatë aksionit janë sekuestruar kokainë dhe kanabis të ndara në dhjetëra doza, që dyshohet se ishin për shitje. Po ashtu, Policia ka sekuestruar dy pistoleta, katër automjete, 19 telefona celularë si dhe para në lekë dhe euro.

Dy prej të arrestuarve, D. S. dhe Sh. B., janë kapur me nga një pistoletë gjatë kontrolleve të kryera me vendim të gjykatës. Armët janë sekuestruar dhe pritet t’i nënshtrohen ekzaminimeve.

Sipas hetimeve, grupi dyshohet se merrej me shitjen e drogës në zona të ndryshme të Sarandës, përfshirë plazhet, lokalet e natës dhe zonat pranë shkollave.

Hetimi kishte nisur më herët. Më 31 korrik, Policia kishte arrestuar tre persona në flagrancë dhe kishte sekuestruar rreth 5 kilogramë kanabis, që dyshohej se do të shpërndahej në Sarandë dhe Ksamil.

Në kuadër të operacionit është proceduar në gjendje të lirë edhe një 36-vjeçar nga Lushnja. Sipas Policisë, ai kishte kundërshtuar efektivët për të penguar kontrollin në një dhomë hoteli. Në atë ambient u gjet një prej personave të arrestuar, ndërsa u sekuestrua edhe një armë zjarri.

Operacioni është zhvilluar me pjesëmarrjen e disa strukturave të Policisë shqiptare, ndërsa hetimet po vazhdojnë nën drejtimin e Prokurorisë së Sarandës për të zbardhur plotësisht aktivitetin e dyshuar kriminal dhe për të identifikuar persona të tjerë që mund të jenë të përfshirë.