Dy të plagosur nga shpërthimi në stacionin e trenit në Gjermaninë jugore

Një objekt i panjohur shpërtheu në orët e para të së mërkurës pranë një stacioni treni në qytetin jugor gjerman të Augsburgut , tha policia gjermane, duke shtuar se dy kalimtarë, të moshës 17 dhe 18 vjeç, u plagosën lehtë.

Shpërthimi ndodhi në korridorin e një ndërtese, sipas policisë së shtetit bavarez, e cila sqaroi se dy të plagosurit janë shtetas ukrainas.

Disa orë më vonë, policia njoftoi se stacioni kryesor i trenit të qytetit ishte mbyllur pasi u gjet një tjetër objekt i dyshimtë.

“Shërbimet e trenit janë pezulluar”, tha policia në platformën X.

Gazeta gjermane Bild raportoi se një granatë shpërtheu përpara një dyqani bizhuterish herët në mëngjes dhe se, sipas indikacioneve fillestare, vetë stacioni i trenit nuk ishte shënjestra.

Një zëdhënës i policisë tha se detajet rreth pajisjes shpërthyese mbeten të paqarta.

Augsburgu është një qendër rajonale transporti dhe ndodhet afërsisht 55 kilometra në veriperëndim të Mynihut.