Presidentja e Komisionit Evropian, Ursula von der Leyen, ka mbërritur në Nuuk, kryeqytetin e Groenlandës, për një vizitë dyditore që synon të rikonfirmojë mbështetjen e Bashkimit Evropian për territorin autonom danez.
Vizita vjen disa muaj pas tensioneve të shkaktuara nga deklaratat e presidentit amerikan Donald Trump, i cili kishte shprehur ambicien për të marrë kontrollin e ishullit arktik, duke përmendur edhe mundësinë e përdorimit të forcës.
Gjatë qëndrimit në Nuuk, Von der Leyen pritet të zhvillojë takime me drejtuesit e Groenlandës dhe kryeministren e Danimarkës. Në agjendë është gjithashtu nënshkrimi i një deklarate të përbashkët mes BE-së dhe Groenlandës.
“Ne jemi një familje”, deklaroi Von der Leyen pas mbërritjes, duke përcjellë mesazhin për forcimin e lidhjeve të Groenlandës me Evropën.
Komisioneri evropian Josef Sikela, i cili e shoqëron Von der Leyen gjatë vizitës, theksoi rëndësinë strategjike të Groenlandës për Evropën.
“Çfarëdo që ndodh në Arktik ndikon drejtpërdrejt në pjesën tjetër të Evropës dhe një partneritet i fortë me Groenlandën është thelbësor për pozicionin tonë në rajon”, deklaroi Sikela.
Deklaratat e Trump në fillim të vitit shkaktuan një krizë të fortë në marrëdhëniet mes Shteteve të Bashkuara dhe aleatëve evropianë. Tensionet u zbutën më pas pas krijimit të një grupi pune mes Danimarkës, Groenlandës dhe SHBA-së, me synimin për të gjetur një zgjidhje afatgjatë.
Ndërkohë, BE-ja ka vijuar të shprehë solidaritetin me Groenlandën dhe Danimarkën, duke e shoqëruar mbështetjen politike me premtime për investime.
Gjatë vizitës, Von der Leyen pritet të mund të njoftojë edhe një paketë të re financiare prej rreth 200 milionë eurosh për Groenlandën, me fokus te përmirësimi i infrastrukturës dhe lidhjeve, energjia e pastër dhe shfrytëzimi i lëndëve të para kritike.