Një sherr i çastit për motive pronësie mes dy vëllezërve ka rrezikuar të degradojë në ngjarje të rëndë kriminale në lagjen “Uji i Ftohtë” në Vlorë. Mësohet se, ndërhyrja e menjëhershme e forcave të rendit pas denoncimit të marrë ka parandaluar përshkallëzimin e mëtejshëm të konfliktit.
Në kuadër të veprimeve operative, policia ka vënë në pranga 47-vjeçarin me iniciale J. T., person me precedentë të mëparshëm penalë në fushën e trafikimit të lëndëve narkotike. Sipas hetimeve paraprake, 47-vjeçari dyshohet se gjatë debatesh të ashpra për pronësinë ka nxjerrë armën dhe ka kanosur vëllanë e tij.
Gjatë kontrollit të ushtruar në vendngjarje, uniformat e bluve sekuestruan në cilësinë e provës materiale, 1 armë zjarri pistoletë, 2 krehra dhe 30 fishekë luftimesh. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë për veprime të mëtejshme hetimore.
Njoftimi i policisë:
“Vlorë/ Finalizohet operacioni i koduar “Lidhja”. Parandalohet përshkallëzimi i konfliktit me armë, për motive pronësie, mes dy vëllezërve në lagjen “Uji i Ftohtë”.
Si rezultat i ndërhyrjes së menjëhershme, vihet në pranga 47-vjeçari me precedent kriminal për trafikim të lëndëve narkotike. Sekuestrohet një armë zjarri pistoletë, me 2 krehra dhe 30 fishekë.
Menjëherë pas njoftimit për një konflikt në një familje në lagjen “Uji i Ftohtë”, shërbimet e Komisariatit të Policisë Vlorë organizuan punën dhe shkuan në vendngjarje, për të sqaruar rrethanat dhe përfshirjen në këtë konflikt.
Si rezultat i veprimeve të shpejta policore, të kryera në kuadër të operacionit të koduar “Lidhja”, u parandaluan ngjarje kriminale në këtë familje, si dhe u arrestua në flagrancë shtetasi J. T., 47 vjeç, pasi dyshohet se, për motive pronësie, ka kanosur me armë zjarri vëllanë.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme”, njofton Policia.
j.l./ dita
