Flakët pushtojnë ullishtet në Kropisht të Shqipërisë, rrezikohen shtëpitë

Një zjarr i fuqishëm ka shpërthyer pasditen e sotme në kodrat e fshatit Kropisht, në Selenicë të Shqipërisë, përcjell Gazeta Metro.

Flakët kanë përfshirë sipërfaqe të mëdha me ullinj, duke shkaktuar dëme dhe duke rritur rrezikun për disa banesa pranë zonës së përfshirë.

Situata mbetet shqetësuese, pasi përhapja e mëtejshme e zjarrit mund të kërcënojë edhe pjesë të tjera të fshatit. Sipas informacioneve të deritanishme, shërbimet zjarrfikëse të Bashkisë Selenicë ende nuk kanë arritur në vendin e ngjarjes.

Banorët po përballen me flakët, ndërsa mbetet e paqartë nëse zjarri do të mund të neutralizohet në kohë përpara se të afrohet më shumë me zonat e banuara./gazetametro.net