Kurti e Abdixhiku takohen sërish për çështjen e presidentit

Kryeministri në detyrë i Kosovës, njëherësh kryetar i Lëvizjes Vetëvendosje (LVV), Albin Kurti, dhe kryetari i Lidhjes Demokratike të Kosovës (LDK), Lumir Abdixhiku, kanë nisur një takim të radhës në diskutimet për çështjen e presidentit të ri të shtetit.

Takimi i së hënës po mbahet në hapësirat e Kuvendit të Kosovës, në përpjekje për t’u dakorduar rreth emrit të ri për president.

“E kemi vullnetin e mirë, i kemi mundësitë reale. Tash po ecim përpara, siç po e shihni, dhe urojmë të arrijmë në një marrëveshje”, tha Kurti para mediave, gjatë hyrjes në Kuvend për takim me Abdixhikun.

Kurti e Abdixhiku u takuan edhe të shtunën vonë, pa një përparim drejt marrëveshjes.
Për shkak të mospajtimeve mes partive parlamentare për pasardhësin e Vjosa Osmanit në postin e të parit të shtetit, Kosova mbajti zgjedhje të parakohshme në qershor.

Dhe, ajo rrezikon të mbajë sërish zgjedhje, që do të ishin të katërtat parlamentare në dy vjetet e fundit, nëse nuk zgjidhet presidenti i ri deri në fillim të shtatorit.

Vendi është me ushtruese të detyrës së presidentit, Albulena Haxhiun, prej kur Osmanit i mbaroi mandati në prill.
Haxhiu, sipas Kushtetutës, mund ta ushtrojë këtë post vetëm për gjashtë muaj – pra deri më 4 tetor.

Ndërkaq moszgjidhja e çështjes së presidentit ka bllokuar edhe konstituimin e Kuvendit të Kosovës.

Partia e Kurtit i fitoi 53 mandate në zgjedhjet e fundit dhe, së bashku me partitë e komuniteteve joshumicë, i ka votat e mjaftueshme prej të paktën 61 sosh, për të konstituuar Kuvendin dhe krijuar Qeverinë e re.

Megjithatë, nevojitet prania e 80 deputetëve në Kuvendin me 120 vende që votimi për presidentin e Kosovës të jetë i vlefshëm.

Me një marrëveshje të mundshme me LDK-në për çështjen e presidentit, e cila i fitoi 18 vende, atëherë do të arriheshin të paktën 81 vota, mjaftueshëm për votimin e presidentit të ri, nëse të paktën 80 prej tyre do të qëndronin në sallë.