Të paktën 27 të vrarë pas sulmit rus në një depo në Bucha

Të paktën 27 persona u vranë pasi një sulm me dron rus shkaktoi një zjarr të madh dhe shpërthime në një depo gjatë natës, sipas autoriteteve lokale.
Tymur Tkachenko, kreu i Administratës Ushtarake të Oblastit të Kievit, tha se të paktën 42 persona, përfshirë katër fëmijë, u plagosën gjithashtu në sulmin në fshatin Myla, ndërsa 381 persona u evakuuan nga zona.

“Sulmi shkaktoi një zjarr në shkallë të gjerë. Zjarri u përhap edhe në ndërtesa private banimi. Zjarret në 5 shtëpi dhe një objekt ushqimi janë shuar tashmë”, shkroi Tkachenko në një postim në Telegram.

Ai shtoi se zjarri u “shoqërua me shpërthime”.
Ekipet e emergjencës dhe të shpëtimit po vazhdojnë punën në vendngjarje.

Zyra e Prokurorit të Përgjithshëm të Ukrainës tha se që atëherë ka nisur një hetim paraprak mbi “neglizhencë” të mundshme rreth kushteve të magazinimit në depo.

“Në veçanti, do të kontrollohet ligjshmëria e vendosjes dhe ruajtjes së objekteve dhe materialeve shpërthyese në territorin e ndërmarrjes, disponueshmëria e lejeve dhe miratimeve të nevojshme, si dhe veprimet e zyrtarëve që kanë marrë vendimet përkatëse”, thuhet në një deklaratë.

Pamjet video që qarkullojnë në mediat sociale, me sa duket të shkrepura pranë vendit të ngjarjes, tregojnë një shpërthim të madh dhe një top zjarri që ngrihet në qiellin e natës.