GJKKO cakton masën “arrest me burg” për ish-zyrtarin e policisë Uljan Shpataraku

Gjykata e Posaçme kundër Korrupsionit dhe Krimit të Organizuar, GJKKO, ka caktuar masën e sigurisë “arrest me burg” për ish-zyrtarin e Policisë së Shtetit, Uljan Shpataraku.

Moskompetenca është kërkuar nga ana e avokatit mbrojtës, po ashtu është kërkuar një masë më e butë sigurimi.

Mësohet se, gjatë seancës, Shpataraku ka mohuar akuzën dhe është shprehur se nuk ka lidhje me veprën penale në ngarkim të tij.

Në seancë, avokati ka paraqitur fakte që përbëjnë rrethana lehtësuese sa i takon masës së sigurimit në ngarkim të Shpatarakut.

Shpataraku, i arrestuar nën dyshimet për përkrahje të autorit të krimit, pasi shoqëronte Ergys Agasin, ishte përjashtuar nga Policia disa javë më parë. Pas arrestimit, ndaj tij nisën edhe procedurat për heqjen e lejes së armës që e posedonte për shkak të funksionit.

Shpatarakut iu hoq leja e armës, ndërsa gjatë procedurave është sekuestruar arsenali i armëve që mbante në banesën e tij.

Gjatë verifikimeve, sipas të dhënave të bëra publike, rezultoi se ish-zyrtari policor mbante në banesë, me leje, disa armë zjarri private.

Në kuadër të procedurave, janë sekuestruar gjithsej 7 armë, konkretisht 3 pistoleta, 2 shotgunë dhe 2 pushkë.