Opozita kroate kundër nderimeve shtetërore për Mlladiçin: Beogradi po dërgon një mesazh politik

Partia opozitare kroate “Ura” ka dënuar planet për varrimin e Ratko Mlladiçit në Serbi me nderime të plota shtetërore dhe ushtarake, duke i bërë thirrje qeverisë kroate të reagojë me “përgjigjen më të fortë diplomatike të mundshme”.

Sipas partisë, ceremonia nuk duhet parë thjesht si një çështje private, por si një mesazh politik për mënyrën se si Serbia e sotme e trajton trashëgiminë e luftërave të viteve ’90, figurat e saj ushtarake dhe viktimat e konflikteve.

“Ura” argumenton se Kroacia ka arsye të veçanta për të reaguar, pasi Mlladiçi e nisi karrierën e tij ushtarake në Kroaci si komandant i Ushtrisë Popullore Jugosllave (JNA), përpara se të bëhej një nga komandantët kryesorë ushtarakë gjatë luftës në Bosnje dhe Hercegovinë.

Mlladiçi u dënua me burgim të përjetshëm për gjenocid, krime kundër njerëzimit dhe krime lufte.

Partia opozitare kroate ka theksuar veçanërisht çështjen e Shkabrnjës, duke deklaruar se Mlladiçi nuk u mbajt përgjegjës për krimet e kryera atje.

“Mlladiçi iku nga kjo botë pa u mbajtur përgjegjës për Shkabrnjën, një nga vendet që mbetet simbol i vuajtjeve të civilëve kroatë dhe brutalitetit të agresionit të Serbisë së Madhe”, deklaroi “Ura”.

Sipas opozitës, një funeral shtetëror me nderime të plota nuk mund të justifikohet thjesht me gradën ushtarake të Mlladiçit apo të trajtohet si një çështje private familjare.

“Ura” paralajmëroi se kur një shtet angazhon institucionet, ushtrinë dhe nderimet më të larta shtetërore për ceremoninë e një personi të dënuar për krime lufte, mesazhi që përcillet është politik dhe lidhet drejtpërdrejt me mënyrën se si ai shtet e sheh të kaluarën e tij të luftës.

Partia i kërkoi qeverisë së Zagrebit të shmangë një reagim të kujdesshëm dhe deklaratat diplomatike të formuluara me tone të buta, duke kërkuar një qëndrim më të fortë ndaj Beogradit.

Në deklaratën e saj, “Ura” ngriti gjithashtu pyetjen se përse Mlladiçi nuk u vu përpara drejtësisë për krimet e kryera gjatë luftës në Kroaci, përfshirë ato në Shkabrnja.

Kroacia, sipas partisë opozitare, nuk duhet të lejojë që kalimi i kohës të zbehë përgjegjësinë për krimet e luftës dhe detyrimin ndaj viktimave.