Një fëmijë 7-vjeçar ka pësuar lëndime trupore si pasojë e një aksidenti trafiku të ndodhur të dielën në rrugën “Sali Çeku” në Ferizaj.
Zëdhënësi i Policisë së Kosovës për rajonin e Ferizajt, Kanun Veseli, ka konfirmuar se aksidenti ka ndodhur rreth orës 19:27, ku janë përfshirë një automjet dhe një këmbësor.
Sipas Veselit, fëmija ka marrë tretman mjekësor dhe më pas është liruar.
Ndërkohë, drejtuesi i automjetit të përfshirë në aksident nuk është ndalur në vendin e ngjarjes, por është larguar.
“Me datën 06.09.2026, rreth orës 19:27, në rrugën ‘Sali Çeku’ në Ferizaj, ka ndodhur një aksident trafiku, ku të përfshirë kanë qenë një automjet dhe një këmbësor. Si pasojë e aksidentit, lëndime trupore ka pësuar një fëmijë 7-vjeçar, i gjinisë mashkullore. I njëjti ka pranuar tretman mjekësor dhe më pas është liruar”, ka deklaruar Veseli.
Ai ka bërë të ditur se policia ka ndërmarrë veprimet e nevojshme për identifikimin dhe gjetjen e automjetit dhe drejtuesit të tij.
“Drejtuesi i automjetit të përfshirë në aksident nuk është ndalur në vendin e ngjarjes dhe është larguar nga aty. Njësitet policore kanë ndërmarrë veprimet e nevojshme për identifikimin dhe gjetjen e automjetit dhe drejtuesit të tij, ndërsa rasti është duke u hetuar nga njësitet kompetente”, ka shtuar ai. /Insajderi.org/
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2026 Gazeta Online Insajderi - Të gjitha të drejtat e rezervuara.
