Ministria e Mbrojtjes ka publikuar përditësimin e fundit mbi situatën e zjarreve në vend, për ditën e 6 shtatorit 2026, deri në orën 20:00.
Gjatë ditës janë raportuar 20 vatra zjarri. Prej tyre, 11 vijojnë të jenë aktive, 7 janë nën mbikëqyrje, ndërsa 2 janë shuar.
Në operacionet për përballimin e situatës janë angazhuar strukturat vendore dhe Forcat e Armatosura, me kapacitete tokësore dhe ajrore.
Një nga zonat ku vijon ndërhyrja intensive është Mali i Dajtit, ku zjarri mbetet aktiv. Në operacion janë angazhuar efektivë, mjete dhe një helikopter i Forcave të Armatosura.
Situatë e vështirë paraqitet edhe në Kryezi të Kavajës, ku përveç forcave zjarrfikëse është angazhuar edhe një avion Air Tractor.
Vatra aktive raportohen edhe në zonën Lundre–Madhesh të Matit. Në Lezhë vijon puna për izolimin e zjarrit në aksin Kalivaç–Zimaj–Kashnjet, me mbështetjen e dy helikopterëve të Forcave të Armatosura.
Në Qarkun e Shkodrës, zjarri në Bardhaj–Myselim mbetet aktiv. Në operacion janë përfshirë strukturat vendore, vullnetarët dhe Forcat e Armatosura, përfshirë dy helikopterë. Aktiv mbetet edhe zjarri në Kulumri të Fushë-Arrëzit.
Vatra aktive janë raportuar gjithashtu në Kropisht të Selenicës, Vokopolë të Poliçanit, Tërbun të Pukës dhe në zona të tjera të vendit.
Ndërkohë, disa vatra në qarqet Korçë, Elbasan, Durrës, Fier, Kukës dhe Shkodër vijojnë të jenë nën mbikëqyrje. Në zonën Drizë–Peshtan–Frakull të Fierit, situata aktualisht është nën kontroll dhe monitorim.
Agjencia Kombëtare e Mbrojtjes Civile vijon monitorimin e pandërprerë të situatës në të gjithë territorin, në koordinim me prefekturat, bashkitë dhe strukturat e sistemit të Mbrojtjes Civile.
Kapacitetet operacionale mbeten të angazhuara në terren dhe në gatishmëri për ndërhyrje, me prioritet mbrojtjen e jetës së qytetarëve, banesave dhe pasurisë.