Një vatër e re zjarri është konstatuar në masivin pyjor të Tërbunit në Pukë, vetëm pak ditë pasi zona u përfshi nga një zjarr i përmasave të mëdha, që dogji rreth 3 mijë hektarë sipërfaqe.
Flakët janë shfaqur në një tjetër pjesë të masivit pyjor, duke rikthyer shqetësimin për situatën në zonë. Terreni i vështirë dhe dendësia e bimësisë favorizojnë përhapjen e shpejtë të zjarrit dhe vështirësojnë ndërhyrjen e forcave zjarrfikëse.
Nga të dhënat paraprake, dyshohet se zjarri mund të jetë shkaktuar qëllimisht. Megjithatë, shkaku i rënies së flakëve nuk është konfirmuar dhe pritet që autoritetet të kryejnë verifikimet për të përcaktuar rrethanat.
Forcat zjarrfikëse janë nisur drejt zonës së Tërbunit për të ndërhyrë dhe për të vënë nën kontroll flakët.
Ndërkohë, shërbimet zjarrfikëse po përballen edhe me vatra të tjera zjarri të raportuara në zona të ndryshme, duke e bërë situatën veçanërisht të vështirë.
#Pukë #Tërbun #Zjarr #Zjarre #Zjarrvënie #Zjarrfikësit #Pyje #Emergjenca #Shqipëri