Ministria e Mbrojtjes ka bërë bilancin e situatës së zjarreve në vend gjatë 24 orëve të fundit, ku janë regjistruar 25 vatra zjarri. Katër prej tyre vijojnë të jenë aktive, ndërsa një tjetër po mbahet nën monitorim nga strukturat përkatëse.
Në terren janë angazhuar 350 forca operacionale dhe 26 automjete zjarrfikëse për përballimin e situatës. Në operacione janë përfshirë edhe Forcat e Armatosura me 140 efektivë, 3 helikopterë dhe 2 avionë të tipit Air Tractor.
Vatrat aktive janë evidentuar në zonën e Dajtit dhe në Priskë të Tiranës, në Lufaj të Mirditës dhe në Tërbun të Pukës.
Në Dajt po vijon puna për izolimin e flakëve me 50 efektivë të Forcave të Armatosura, 15 zjarrfikës dhe 5 forca të Agjencisë së Zonave të Mbrojtura. Sipas Ministrisë së Mbrojtjes, aktualisht nuk paraqitet rrezik për zonat e banuara.Situata po mbahet nën kontroll edhe në Tërbun, ku në operacion janë angazhuar strukturat vendore, forcat e ushtrisë dhe vullnetarë. Ndërhyrja po mbështetet nga dy helikopterë, ndërsa nuk raportohet rrezik për banesat.
Ndërkohë, disa prej vatrave të raportuara gjatë ditëve të fundit janë shuar. Zjarret në Gurë-Lurë, Bruç të Matit, Tharr të Mirditës dhe Selenicë janë neutralizuar plotësisht.
