Prej 80 ditësh qytetarët vijojnë protestën kundër qeverisë dhe kryeministrit Edi Rama, duke kërkuar largimin e tij nga drejtimi i vendit.
Pjesë e protestës së sotme ishte edhe profesori i artit Everest Ymeraj. Në një prononcim për News24, ai tha se ka marrë pjesë në të gjitha tubimet dhe se do të qëndrojë në protestë deri në përfundim të saj.
Ymeraj theksoi se krahas kërkesës për dorëheqjen e kryeministrit, protestuesit kërkojnë respektimin e ligjeve dhe të drejtave të qytetarëve.
“Dita e 80-të që marr pjesë dhe do të jem pjesë e protestës deri në ditët e fundit. Kërkoj çdo ditë të respektohen të drejtat e njeriut dhe ligjet”, deklaroi ai.
Profesori kritikoi gjithashtu mungesën e një pjese të komunitetit të artistëve në protestë. Sipas tij, shumë prej tyre ndihen të fyer dhe të dekurajuar, ndërsa frika nga paragjykimi i pengon të dalin në shesh.
