Situata e zjarreve vijon të mbetet problematike në disa zona të vendit, ku aktualisht janë aktive 11 vatra nga 20 të evidentuara gjatë ditës.
Sipas të dhënave të Ministrisë së Mbrojtjes, shtatë vatra po monitorohen, ndërsa dy të tjera janë shuar. Për përballimin e situatës janë vënë në dispozicion forca dhe mjete të strukturave vendore, si dhe kapacitete të Forcave të Armatosura.
Ndër zonat ku vijon ndërhyrja është mali i Dajtit, ku zjarri nuk është neutralizuar ende. Në operacion janë angazhuar efektivë, mjete dhe një helikopter.
Flakët vijojnë gjithashtu në Kryezi të Kavajës, ku operacionit nga toka i është shtuar edhe ndërhyrja nga ajri me një avion “Air Tractor”.
Në Mat, vatra në zonën Lundre–Madhesh mbetet aktive, ndërsa në qarkun e Lezhës po punohet për shuarjen e zjarrit në aksin Kalivaç–Zimaj–Kashnjet. Për këtë operacion janë vënë në dispozicion dy helikopterë të Forcave të Armatosura.
Edhe qarku i Shkodrës vijon të përballet me vatra aktive. Ndërhyrja në Bardhaj–Myselim po kryhet nga strukturat vendore, vullnetarë dhe Forcat e Armatosura, ndërsa dy helikopterë janë përfshirë në operacion. Në Fushë-Arrëz raportohet gjithashtu një vatër aktive në Kulumri.
Zjarre aktive janë evidentuar edhe në Kropisht të Selenicës dhe Vokopolë të Poliçanit.
Paralelisht, në disa zona të tjera situata është stabilizuar dhe vatrat po mbahen nën vëzhgim. Monitorimi vijon në qarqet Korçë, Elbasan, Durrës, Fier, Kukës dhe Shkodër. Në Drizë–Peshtan–Frakull të Fierit, zjarri është aktualisht nën kontroll.
Agjencia Kombëtare e Mbrojtjes Civile po koordinon monitorimin e situatës me prefekturat, bashkitë dhe strukturat e tjera përgjegjëse, ndërsa forcat operacionale mbeten në terren dhe në gatishmëri për ndërhyrje të menjëhershme.
Sipas autoriteteve, fokusi kryesor i operacioneve është mbrojtja e banesave, pasurisë dhe jetës së qytetarëve.
