Këshilli Bashkiak i Divjakës është mbledhur këtë të premte për të diskutuar draftin e dërguar nga Kuvendi në kuadër të projekt-reformës administrative territoriale, e cila parashikon bashkimin e Bashkisë Divjakë me atë të Lushnjës.
Mbledhjen e ka hapur kryetarja e Këshillit Bashkiak, Liri Biti, e cila prezantoi rendin e ditës. Në takim morën pjesë 20 nga 31 këshilltarët bashkiakë.
Këshilltarët e djathtë kërkuan që në rendin e ditës të përfshihej edhe një pikë për njohjen me korrespondencën e Bashkisë Divjakë me komisionin hartues të reformës administrative territoriale. Kërkesa u miratua me 20 vota pro, asnjë kundër dhe asnjë abstenim.
Në vijim, këshilltarët vendosën unanimisht që komisioni përgjegjës për zhvillimin e dëgjesave publike në kuadër të reformës të përbëhet nga 7 anëtarë, katër përfaqësues të bashkisë dhe tre këshilltarë të Këshillit Bashkiak.
Dëgjesat publike do të zhvillohen në pesë njësitë administrative të Divjakës: Divjakë, Tërbuf, Grabjan, Gradishtë dhe Remas**. Përfundimet e tyre do t’i përcillen më pas Kuvendit.Gjatë mbledhjes, këshilltarët kërkuan gjithashtu shpjegime nga kryetari i bashkisë, Josif Gorrea, lidhur me qëndrimin e mbajtur prej tij në mbledhjen e zhvilluar në Kuç.
Pavarësisht përkatësive politike, këshilltarët shprehën qëndrimin e tyre në favor të ruajtjes së Divjakës si bashki më vete, duke kundërshtuar përfshirjen e saj nën administrimin e Bashkisë Lushnjë.
Me miratimin e strukturës së komisionit, Këshilli Bashkiak i Divjakës i ka hapur rrugë zhvillimit të dëgjesave publike, të cilat pritet të zhvillohen gjatë dy muajve të ardhshëm dhe të shërbejnë si qëndrimi zyrtar i komunitetit përpara Kuvendit.
Reforma e propozuar administrative-territoriale parashikon që Bashkia Divjakë të bashkohet me Bashkinë Lushnjë
