Prokuroria e Posaçme kundër Korrupsionit dhe Krimit të Organizuar (SPAK) ka hapur thirrjen për aplikime për 40 pozicione hetuesish në Byronë Kombëtare të Hetimit (BKH).
Sipas njoftimit të SPAK, kandidatët që duan të marrin pjesë në konkurrim duhet të plotësojnë disa kritere. Ata duhet të jenë shtetas shqiptarë dhe të kenë arsim të lartë policor, në drejtësi, kontabilitet ose në degë të tjera që lidhen me misionin e BKH-së.
Një tjetër kriter është që kandidatët të kenë më shumë se një vit përvojë pune në institucionet e zbatimit të ligjit ose në një fushë të lidhur me misionin e BKH-së.
Gjithashtu, ata duhet të plotësojnë kushtet e integritetit, sigurisë, pasurisë dhe figurës.
Procesi i konkurrimit përfshin disa etapa, mes tyre testin konjitiv, testin e sjelljes dhe të arsyetimit logjik, testimin e aftësive fizike, testin e zgjeruar me shkrim dhe intervistën e strukturuar.
Kandidatët do t’i nënshtrohen gjithashtu testit të poligrafit, verifikimit të pasurisë, figurës dhe sigurisë, si dhe kontrollit mjekësor dhe psikologjik.
Sipas SPAK, këto procedura nuk pikëzohen, por janë të detyrueshme për kandidatët.
Afati për aplikim është deri më 14 shtator 2026, ora 16:00. Aplikimet mund të bëhen nga data e publikimit të thirrjes.
