Kryeministri Edi Rama ka komentuar protestat qytetare që prej 77 ditësh kërkojnë dorëheqjen e tij, duke i krahasuar me tubimet e qershorit dhe duke argumentuar se protestat e fundit kanë një karakter më të theksuar politik.
Në një intervistë për median britanike “UnHerd”, Rama tha se protestat aktuale, nxiten kryesisht nga forca të vogla opozitare, si nga e majta ashtu edhe nga e djathta ekstreme.
“Protestat e sotme nuk janë protestat e qershorit, kështu që njerëzit që folën sot janë të ndryshëm”, deklaroi Rama.
Megjithatë, kryeministri u shpreh se ishte “shumë krenar” për karakterin paqësor të protestave, duke e cilësuar këtë si një tregues të një vendi normal europian, ku qytetarët kanë të drejtën të protestojnë.
“Jam shumë, shumë krenar që kemi pasur një protestë kaq të madhe për ditë të tëra në një mënyrë shumë paqësore, dhe se askush nuk u lëndua”, tha ai.
Kryeministri përsëriti edhe qëndrimin e tij mbi rolin e rrjeteve sociale në mobilizimin e qytetarëve.
Sipas tij, algoritmet kanë ndikuar në përhapjen e përmbajtjeve që lidhen me protestat, ndërsa një pjesë e madhe e kësaj përmbajtjeje është prodhuar jashtë Shqipërisë.
“Algoritmi bëri shumë për t’i sjellë ato në bulevard. Një përqindje shumë e lartë e përmbajtjes prodhohet jashtë. Nuk është shqiptare”, u shpreh Rama.
Sa i përket projektit të Zvërnecit, kryeministri bëri të qartë se qeveria nuk planifikon të tërhiqet, por do të zhvillojë një proces konsultimi me palët e interesuara.
“Nëse kjo nuk do të kishte të bënte me Jared Kushnerin, Trumpin, Ivankën dhe të gjitha llojet e fantazive, kjo nuk do të kishte qenë aq e mirë për algoritmin”, tha Rama, duke shtuar se në fund projekti do të jetë i suksesshëm.
