Çmimet e naftës janë rritur sërish, ndërsa tensionet mes Shteteve të Bashkuara dhe Iranit vazhdojnë për të katërtën ditë radhazi, duke shtuar pasiguritë për transportin detar në Ngushticën e Hormuzit dhe për furnizimin global me energji.
Nafta bruto Brent, standardi ndërkombëtar, u rrit me 0.9%, duke arritur në 72.20 dollarë për fuçi, ndërsa nafta amerikane u rrit me 1.3%, në 70.09 dollarë për fuçi.
Rritja vjen vetëm pak ditë pasi çmimet kishin rënë në nivelet më të ulëta që nga fillimi i konfliktit, me tregjet që prisnin se marrëveshja e arritur mes SHBA-së dhe Iranit do të lehtësonte lundrimin në Ngushticën e Hormuzit.
Pas nënshkrimit të marrëveshjes më 17 qershor, të dyja vendet njoftuan se kjo rrugë strategjike detare do të rihapej pa tarifa shtesë, çka solli fillimisht rritje të trafikut të cisternave të naftës.
Megjithatë, situata ndryshoi pasi Irani sulmoi një anije në Ngushticën e Hormuzit të enjten, ndërsa Kombet e Bashkuara pezulluan planet për evakuimin e marinarëve dhe anijeve të bllokuara në zonë.
Për shkak të përplasjeve mes forcave amerikane dhe iraniane, një pjesë e anijeve tregtare kanë ndryshuar itinerarin, duke lundruar pranë brigjeve të Omanit për të shmangur rrezikun.
Analistët vlerësojnë se rikthimi i lundrimit nuk mjafton për të stabilizuar tregun. Dëmet në infrastrukturën energjetike pritet të kërkojnë muaj për t’u riparuar, ndërsa normalizimi i plotë i trafikut të cisternave në Ngushticën e Hormuzit nuk pritet të ndodhë në një periudhë të shkurtër.
Sipas ekspertëve, ekziston mundësia që çmimet e naftës të mos rikthehen në nivelet e para konfliktit as gjatë vitit 2026.
Megjithatë, krahasuar me kulmin e arritur në prill, kur nafta Brent preku rreth 126 dollarë për fuçi, çmimet aktuale mbeten dukshëm më të ulëta.
Kjo ka ndikuar pozitivisht edhe te konsumatorët amerikanë. Sipas Shoqatës Amerikane të Automobilave (AAA), çmimi mesatar i benzinës së zakonshme ishte 3.87 dollarë për galon të dielën, rreth 13% më i ulët krahasuar me një muaj më parë.
Ndërkohë, kontratat me afat në Wall Street mbetën kryesisht të pandryshuara, ndërsa investitorët vijojnë të monitorojnë nga afër zhvillimet mes SHBA-së dhe Iranit.
