Policia e Kosovës ka realizuar këtë të martë, në pikën kufitare në Vërmicë, ekstradimin nga Shqipëria për në Kosovë të një shqiptari në kërkim ndërkombëtar.
Sipas policisë së Kosovës, i arrestuari, identiteti i të cilit ende nuk bëhet publik, u arrestua nga autoritetet e Shqipërisë bazuar në një urdhërarrest ndërkombëtar të lëshuar përmes INTERPOL-it nga institucionet e drejtësisë së Republikës së Kosovës. Mësohet se ai ishte i shpallur në kërkim për veprën penale “Vrasje“, për të cilën është dënuar me 11 vjet e 6 muaj burgim.
Sipas raportimeve, pas përfundimit të procedurave të ekstradimit, i dënuari iu dorëzua njësive përkatëse të Drejtorisë Rajonale të Policisë në Pejë, për procedim të mëtejshëm ligjor dhe dërgim në qendrën korrektuese për vuajtje të dënimit.
