I ftuar në studion e Ora News, ish-deputeti Lefter Maliqi ka folur për zgjedhjet në Kuçovë dhe akuzat e tij për parregullsi gjatë procesit elektoral.
Maliqi pretendon se rezultati i zgjedhjeve është ndikuar përmes ndërhyrjeve në disa kuti votimi dhe se për këtë çështje ka depozituar 11 kallëzime në SPAK.
Sipas tij, gara ka qenë e pabarabartë që në nisje, pasi kandidatura e tij nuk kishte mbështetjen e strukturave partiake, komisionerëve apo fondeve.
Maliqi pretendon se, pavarësisht kësaj, arriti të merrte mbështetje në të gjitha fshatrat dhe në Kuçovën e vjetër.
Ai e lidh rezultatin përfundimtar me një diferencë prej rreth 500-600 votash, ndërsa pretendon se rreth 800 vota janë marrë nga një kandidat tjetër. Po sipas Maliqit, parregullsi kanë ndodhur në dy lagje të Kuçovës, “Llukan Prift” dhe “Tafil Skëndo”.Pa vulë, pa komisioner, pa fonde, arrita të fitoja të gjitha fshatrat dhe Kuçovën e vjetër. Më ndërruan kutitë vetëm në dy lagje, Llukan Prift dhe Tafil Skëndo. Kam bërë 11 kallëzime në SPAK dhe çfarë ka ndodhur? Një cirk me institucionet dhe drejtësinë.”-tha ish-deputeti.
Maliqi ka përmendur edhe procesin e ndjekur në institucionet zgjedhore, duke thënë se çështja ka kaluar në KQZ, KAS dhe Kolegj Zgjedhor.
Sipas tij, pavarësisht ankimimeve dhe kallëzimeve, çështja nuk ka marrë zgjidhjen që ai kërkon.
Në qendër të akuzave të tij është edhe zbatimi i Ligjit të Dekriminalizimit. Maliqi ka kërkuar që ky ligj të zbatohet njësoj për të gjithë kandidatët, duke iu referuar detyrimit për deklarimin e dënimeve të formës së prerë brenda apo jashtë vendit.
Ai ka sjellë si shembuj disa raste të mëparshme të zyrtarëve që kanë humbur mandatet pas problemeve me deklarimet në formularët e dekriminalizimit.
Sipas tij, standardet duhet të jenë të njëjta për çdo kandidat, pavarësisht pozicionit politik apo mbështetjes që mund të ketë.
“Ligji i dekriminalizimit thotë qartë se kandidati është i detyruar të deklarojë nëse ka qenë i dënuar brenda apo jashtë vendit me vendim të formës së prerë. Nëse nuk e deklaron dhe ka dijeni për dënimin, kemi falsifikim të formularit. Të tjerët kanë lënë mandatin për këtë arsye. Pse ky rast duhet të jetë ndryshe?”-shtoi ai.
Maliqi ka ngritur gjithashtu akuza për ndikim të interesave ekonomike dhe politike në proceset zgjedhore dhe në institucionet e drejtësisë. Ai ka përdorur termin “lobingje” për të përshkruar atë që e konsideron si ndikim të aktorëve të fuqishëm mbi vendimmarrjen.
Ish-deputeti ka kritikuar edhe gjendjen e Kuçovës, duke e lidhur zhvillimin e dobët të qytetit me keqpërdorimin e pushtetit dhe interesat që, sipas tij, kanë ndikuar në zonë.
Pretendimet e ngritura në studio lidhen me një proces zgjedhor dhe me kallëzime që Maliqi thotë se janë depozituar pranë SPAK. Për akuzat e bëra prej tij, përgjegjësia dhe vërtetësia e tyre mbeten për t’u përcaktuar nga institucionet përkatëse dhe proceset ligjore
