Konflikti ne Orikum mes dy biznesmeneve, gjobë apo mosmarreveshje për një investim në Palasë?

Kamerat e sigurisë kanë fiksuar disa automjete që mbërrijnë pranë resortit “Regina Palm”, në pronësi të biznesmenit Vasil Bedinaj. Prej tyre kanë zbritur më shumë se dhjetë persona, disa prej të cilëve dyshohet se kanë qenë të armatosur. Pak më vonë, Policia e Vlorës është vënë në alarm.

“Rreth orës 11:30, pronari i një resorti në Vlorë ka njoftuar Policinë se persona të armatosur po konfliktoheshin me të”, thuhet në njoftimin zyrtar.
Pas marrjes së njoftimit, shërbimet e Policisë kanë konstatuar pranë Pusit të Mezinit një automjet që lëvizte me shpejtësi dhe janë vënë në ndjekje të tij. Drejtuesi ka humbur kontrollin e makinës, e cila është përmbysur në rrugë.

Policia nuk dha hollësi mbi shkaqet e përplasjes, pasi motivet dhe përgjegjësitë e personave të përfshirë mbeten ende objekt hetimi.

“Në automjet janë konstatuar tre shtetas, dy prej të cilëve janë dëmtuar si pasojë e aksidentit, ndërsa tjetri nuk ka probleme shëndetësore”, njoftoi Policia.
Gjatë kontrollit të automjetit, policia ka gjetur një pistoletë. 

Versioni i Vasil Bedinajt: kërcënim dhe gjobë prej pesë milionë eurosh

Versioni i parë që qarkulloi pas ngjarjes ishte ai i Vasil Bedinajt. Sipas raportimeve që i referohen dëshmisë së tij në polici, disa automjete kanë rrethuar hotelin, ndërsa persona të armatosur e kanë kërcënuar.

Bedinaj ka pretenduar se dy prej tyre i kanë kërkuar pesë milionë euro, duke i vendosur edhe një ultimatum: të paguante ose të largohej brenda 48 orëve nga Shqipëria.

“Pesë milionë euro gjobë, përndryshe largohu nga Shqipëria”, raportohet të ketë deklaruar Bedinaj në Polici.
Sipas këtij versioni, pas konfliktit personat janë larguar me automjetin që më pas u aksidentua pranë Urës së Peshkëpisë, në rrugën e Lumit të Vlorës.

Pretendimi për gjobëvënie nuk është konfirmuar zyrtarisht nga Policia dhe, në këtë fazë, përbën vetëm versionin e dhënë nga Bedinaj.

Versioni tjetër: mosmarrëveshje për një investim në Palasë

Disa orë pas ngjarjes qarkulloi një version tjetër, i cili e bën historinë më të ndërlikuar. Sipas tij, biznesmeni Luan Muça, pronar dhe administrator i kompanisë “Delta”, ka qenë vetë i pranishëm në hotel dhe është takuar me Bedinajn për të diskutuar një mosmarrëveshje që lidhet me një investim turistik në Palasë.

Sipas këtij versioni, konflikti nuk ka lindur rastësisht. Në qendër të tij dyshohet se qëndron një çështje pronësie dhe aksesi rrugor pranë zonës ku kompania “Delta” po zhvillon projektin turistik “Delta Falaise Resort & Village”.

Pretendohet se Bedinaj, i cili zotëron një pronë aty pranë dhe kontrollon një dalje rrugore, ka kërkuar një përqindje të pronës së projektit. Muça thuhet se e ka kundërshtuar këtë kërkesë. Takimi i së enjtes dyshohet se ishte organizuar pikërisht për të sqaruar mosmarrëveshjen, por situata ka përshkallëzuar deri në ndërhyrjen e Policisë.

Këto pretendime nuk janë konfirmuar ende zyrtarisht dhe duhet të trajtohen si pjesë e një versioni alternativ të ngjarjes.

Kompania “Delta” rezulton përfituese e statusit të investitorit strategjik për fazën e parë të projektit “Delta Falaise Resort & Village”. Projekti është parashikuar të shtrihet në zonën mes Palasës dhe Dhërmiut dhe përfshin ndërtimin e një kompleksi hotelesh dhe vilash.

Personat që shoqëronin Muçën gjatë takimit raportohet se janë punonjës të kompanisë private “SëAT Security”, e kontraktuar për sigurinë e bizneseve të tij. As ky element nuk është sqaruar plotësisht nga autoritetet.

Policia ende pa një version përfundimtar

Në njoftimin e parë, Policia e Vlorës është treguar tepër e rezervuar. Ajo nuk ka konfirmuar pretendimin për gjobën prej pesë milionë eurosh, por nuk ka përmendur as konfliktin për pronën në Palasë. Gjithashtu, nuk ka identifikuar publikisht protagonistët dhe nuk ka përcaktuar se kush ka kërcënuar kë.

“Është ngritur një grup i posaçëm hetimor, i cili, në drejtimin e Prokurorisë, po punon për zbardhjen e dinamikës së ngjarjes dhe identifikimin e të gjithë shtetasve të përfshirë”, thuhet në njoftimin zyrtar.
Në këtë fazë ekzistojnë dy versione që përplasen me njëri-tjetrin: ai i një tentative për gjobëvënie prej pesë milionë eurosh dhe ai i një konflikti ekonomik e pronësor mes dy biznesmenëve.

Policia duhet të sqarojë se përse në hotel mbërritën më shumë se dhjetë persona, cilët prej tyre ishin të armatosur, kujt i përkiste pistoleta e gjetur në automjet, çfarë marrëdhënieje kishin personat e aksidentuar me palët dhe nëse kërkesa për pesë milionë euro është reale apo pjesë e konfliktit mes tyre.

Deri atëherë, ajo që dihet me siguri është se një takim mes dy përfaqësuesve të biznesit të madh përfundoi me persona të armatosur, ndjekje policore, një automjet të përmbysur dhe dy të plagosur. Pjesa tjetër duhet të ndahet mes fakteve, pretendimeve të palëve dhe asaj që do të provojë hetimi.

“Call Centerat shqiptarë po mashtrojnë grekët”, ministri lëshon alarmin: Do arrestohen të gjithë!

15:00 Kronika 3 komente

Kërcënimet e pretenduara nga biznesmeni në Vlorë, reagon policia: Në automjetin e aksidentuar ishin tre persona, u gjet edhe një pistoletë

14:50 Kronika 3 komente

Alarm për zjarret, 5 qarqe në rrezik të lartë gjatë dy ditëve

14:20 Kronika

Goditi me grushte punonjësin e policisë, arrestohet 27-vjeçari në Sarandë

12:50 Kronika 1 koment

Dështon pretenca për “Plumbin e Artë”, seanca shtyhet për 17 shtator

12:20 Kronika

U ekzekutua në Mirditë, një i shoqëruar për vrasjen e Viktor Bardhit

12:10 Kronika 1 koment

Saga e përgjakshme e Mirditës, 9 vite përplasje dhe viktima: nga Saimir Jaku te ekzekutimi i sotëm i Viktor Bardhit

11:20 Kronika 22 komente

“Parodi” në KLP, zinxhir kërkesash për përjashtim gjatë garës për Prokurorin e Përgjithshëm

10:38 Kronika 23 komente

FOTO/ Dyshohet se u përdor në atentatin ndaj Viktor Bardhit, gjendet automjeti i djegur në Ndërfushaz të Mirditës

09:55 Kronika 1 koment

Të shtëna me armë zjarri në Mirditë, vritet Viktor Bardhi

09:40 Kronika