Transporti publik në Tiranë pritet t’i rikthehet kapacitetit të plotë, pas marrëveshjes së arritur mes qeverisë dhe shoqatave të transportit.
Gjatë takimit me institucionet përkatëse, shoqatat e Transportit Urban dhe Interurban kanë rënë dakord me kushtet e propozuara nga qeveria për përballimin e situatës së krijuar nga rritja e çmimit të naftës.
Sipas marrëveshjes, qeveria do të ofrojë subvencion për naftën për një periudhë 3-mujore, masë që synon të lehtësojë kostot e operatorëve të transportit dhe të mundësojë rikthimin e të gjithë flotës së autobusëve në qarkullim.
Problematika u shfaq më 1 shtator, pas rritjes së çmimit të naftës, e cila shtoi kostot e operimit për kompanitë e transportit publik.
Përballë situatës së krijuar, Shoqatat e Transportit Urban dhe Interurban kishin paralajmëruar reduktimin me 20 deri në 30 për qind të flotës së autobusëve në qarkullim, duke argumentuar se nuk ishin në gjendje të përballonin kostot e reja të karburantit.
Me marrëveshjen e arritur me qeverinë dhe subvencionimin e naftës për tre muaj, operatorët pritet të rikthejnë në qarkullim të gjithë autobusët, duke shmangur reduktimin e paralajmëruar të shërbimit.
