Rr. Ismail Qemali, Pallati 18, Kati 1, 1001, Tiranë, Shqipëri
“Shekulli Group”
Një ngjarje e rëndë ka tronditur Igumenicën në Greqi, ku një 24-vjeçare ndodhet në gjendje kritike në terapi intensive, pasi dyshohet se u rrëzua nga makina e drejtuar nga partneri i saj 29-vjeçar, pas një konflikti mes tyre.
Ngjarja ka ndodhur në orët e para të mëngjesit të së martës. Sipas autoriteteve greke, mes çiftit kishte pasur një debat dhe më pas 29-vjeçari ka hipur në automjet dhe e ka vënë atë në lëvizje, ndërsa 24-vjeçarja ndodhej mbi kofanon e makinës.
Burri dyshohet se ka vijuar të drejtojë automjetin, pavarësisht se gruaja ndodhej mbi kofano. Pas lëvizjes së makinës, 24-vjeçarja ka rënë në asfalt dhe ka pësuar plagë të rënda, kryesisht në kokë.
Fillimisht, policia u njoftua për një ngjarje që dukej si aksident rrugor. E plagosura u gjet në gjendje të rëndë dhe u transportua fillimisht në spitalin e Filatit. Për shkak të gjendjes së saj, ajo u dërgua më pas në Spitalin Universitar të Janinës, ku u shtrua në repartin e terapisë intensive. Mjekët e kanë cilësuar gjendjen e saj kritike.
Ndërkohë, 29-vjeçari është arrestuar nga policia greke dhe ndaj tij është ngritur dosje për tentativë vrasjeje, si dhe për shkelje të Kodit Rrugor.
Gjatë kontrollit, 29-vjeçari iu nënshtrua edhe testit të alkoolit, i cili rezultoi pozitiv, duke treguar se ishte nën efektin e alkoolit në momentin e ngjarjes.
I arrestuari pritet të dalë para Prokurorisë së Thesprotisë, ndërsa hetuesit po përpiqen të rindërtojnë me saktësi atë që ndodhi pas debatit mes çiftit dhe rrethanat në të cilat 24-vjeçarja përfundoi mbi kofanon e makinës.
Hetimi vijon për të përcaktuar dinamikën e plotë të ngjarjes dhe përgjegjësinë penale të 29-vjeçarit.
Për t’u bërë pjesë e grupit të "Shekulli"
mjafton të klikoni: Join our FB Group dhe kërkesa do t’ju aprovohet.
KOMUNITETI SHEKULLI ONLINE: https://www.facebook.com/groups/1381242728701899/
.jpg)
