Publikuar më 31.08.2026 nga Shek

Detaje të reja kanë dalë në dritë, nga vdekja e Allison Guerriero, ish-partnerja e ish-zyrtarit të lartë të FBI-së, Charles McGonigal. Ajo u gjet e vdekur në banesën e saj në Florida, në rrethana që ende nuk janë sqaruar.

52-vjeçarja, e cila kishte denoncuar më herët aktivitetet e McGonigal dhe kishte folur publikisht për çështjen që tronditi FBI-në, kishte qenë jashtëzakonisht aktive në rrjetin social X vetëm disa orë para vdekjes së saj.

Sipas raportimeve të mediave amerikane, Guerriero kishte publikuar rreth 75 postime në X, ku rikthehej te kritikat e saj të ashpra ndaj FBI-së dhe zyrtarëve të saj.

Në një prej postimeve të fundit ajo shkruante: “E urrej FBI-në”.

Në një video të publikuar po atë ditë, Guerriero shfaqej duke ecur në rrugët e Boynton Beach, në Florida, dhe kërkonte që vëmendja të mos përqendrohej vetëm te McGonigal, por edhe te zyrtarë të tjerë federalë.

“Problemi me Charles McGonigal është se ju e dini emrin e tij, por nuk e dinit më parë. Ju njihni Jim Comey-n, njihni Chris Wray-n… Pse nuk filloni të kërkoni emrat që nuk i dini?”, deklaronte ajo.

Guerriero kishte qenë prej vitesh në një betejë publike me ish-zyrtarin e FBI-së. Marrëdhënia e tyre 18-mujore dhe informacionet që ajo u dha autoriteteve amerikane u bënë pjesë e historisë që çoi në ekspozimin e aktiviteteve të McGonigal, përfshirë marrëdhëniet e tij me oligarkun rus Oleg Deripaska dhe çështjen e pagesave të marra nga një ish-zyrtar shqiptar i inteligjencës.

McGonigal u arrestua në janar 2023 dhe më pas u dënua me gjashtë vjet e gjashtë muaj burg federal. Guerriero kishte deklaruar se ai duhej të merrte një dënim edhe më të rëndë, duke e cilësuar “tradhtar”.

Babai i Guerrieros, Bill, ka thënë se familja ende nuk e di shkakun e saktë të vdekjes dhe po pret rezultatet e autopsisë. Megjithatë ai është shprehur se nuk beson se vajza e tij mund ti jepte fund jetës.

“Mund të ketë qenë një aksident. Mund të ketë rrëshqitur. Mund të ketë qenë çdo gjë. Po presim certifikatën e vdekjes që të dimë se çfarë ka ndodhur”, ka deklaruar ai për Daily Mail.

Sipas raportimeve, policia nuk ka bërë të ditur deri tani ndonjë provë që të tregojë se bëhet fjalë për një vepër penale dhe hetimi vijon.

Vdekja e Guerrieros ka ngritur pikëpyetje të shumta për shkak të aktivitetit të saj publik vetëm disa orë më parë, por nuk ka aktualisht prova publike që ta lidhin vdekjen e saj me aktivitetin kundër FBI-së apo me çështjen McGonigal.

Guerriero ishte zhvendosur në Florida rreth tre vite më parë dhe, sipas babait të saj, kishte qenë në një periudhë të mirë të jetës së saj. Ajo ecte çdo ditë, bënte ushtrime dhe kalonte kohë në plazh.

Hetimet dhe autopsia pritet të hedhin dritë mbi rrethanat e vdekjes së 52-vjeçares, ndërsa aktiviteti i saj i fundit në X, me rreth 75 postime dhe sulme të drejtpërdrejta ndaj FBI-së, tashmë është një nga elementët që po tërheq më shumë vëmendje.