Rr. Ismail Qemali, Pallati 18, Kati 1, 1001, Tiranë, Shqipëri
“Shekulli Group”
Ministria e Shëndetësisë dhe Mirëqenies Sociale ka reaguar pas humbjes tragjike të jetës së 37-vjeçares shtatzënë nga Pogradeci, Marjana Karolina Bunaj.
E reja humbi jetën në muajin e shtatë të shtatzënisë teksa po transportohej drejt Tiranës për të marrë ndihmë të specializuar mjekësore.
Përmes një reagimi zyrtar, Ministria e Shëndetësisë ka shprehur keqardhjen për ngjarjen, ndërsa ka bërë të ditur se po ndiqen dhe verifikohen të gjitha hapat që lidhen me trajtimin dhe menaxhimin e rastit.
“Çdo gjetje do të analizohet me seriozitetin maksimal”, thekson ministria, duke shtuar se nëse gjatë verifikimeve do të evidentohen parregullsi apo mangësi, do të merren të gjitha masat e nevojshme, në përputhje me ligjin dhe standardet profesionale.
Reagimi i ministrisë vjen në një kohë kur ngjarja ka ngritur pikëpyetje mbi mënyrën e trajtimit të pacientes dhe procesin e transportimit të saj drejt Tiranës për marrjen e shërbimit të specializuar.
Reagimi i plotë
“Ministria e Shëndetësisë dhe Mirëqenies Sociale shpreh keqardhjen e thellë për humbjen e jetës së pacientes M.K. dhe i përcjell familjes dhe të afërmve ngushëllimet më të sinqerta. Në respekt të familjes dhe në këtë moment të dhimbshëm, MSHMS po ndjek me përgjegjshmëri të plotë të gjitha hapat që lidhen me trajtimin dhe menaxhimin e këtij rasti.
Ministria ka kërkuar kryerjen e një vlerësimi të plotë dhe të pavarur të menaxhimit të rastit, me qëllim vlerësimin profesional dhe të paanshëm të të gjithë procesit të kujdesit shëndetësor, nga paraqitja e pacientes deri në përfundimin e trajtimit. Angazhimi ynë është i plotë për të garantuar transparencë dhe përgjegjshmëri.
Çdo gjetje mbi vlerësimin e menaxhimit të rastit do të analizohet me seriozitetin maksimal dhe, nëse evidentohen parregullsi apo mangësi në ndjekjen e rastit, do të merren të gjitha masat e nevojshme, në përputhje me ligjin dhe standardet profesionale.
Siguria e nënës dhe garantimi i kujdesit obstetrikal në kohë, me cilësi dhe në përputhje me standardet e përcaktuara, janë përgjegjësi të panegociueshme të sistemit shëndetësor”, thuhet në reagimin e Ministrisë.
Për t’u bërë pjesë e grupit të "Shekulli"
mjafton të klikoni: Join our FB Group dhe kërkesa do t’ju aprovohet.
KOMUNITETI SHEKULLI ONLINE: https://www.facebook.com/groups/1381242728701899/
.jpg)
